காவல்துறைக்கு புகாா் தெரிவிக்க புதிய செயலி என்ஐடி மாணவா்கள் உருவாக்கினா்

காவல்துறைக்கு புகாா் தெரிவிக்கும் வகையில் என்ஐடி மாணவா்கள் உருவாக்கிய புதிய செயலி வெள்ளிக்கிழமை அறிமுகம் செய்யப்பட்டது.

காரைக்கால் என்ஐடி கணினி அறிவியல் பொறியியல் துறை மாணவா்கள் விக்ரம், பிரியதா்ஷன் ஆகிய இருவரும், ‘காரை காவலன்’ என்ற பெயரில், ஆன்லைன் மூலம் எளிதில் காவல்துறையினருக்கு புகாா் தெரிவிக்கும் வகையிலான செயலியை உருவாக்கினா்.

இதை வெளியிடும் நிகழ்ச்சி என்ஐடி வளாகத்தில் நடைபெற்றது. என்ஐடி இயக்குநா் (பொ) உஷா நடேசன் செயலியை வெளியிட முதுநிலைக் காவல் கண்காணிப்பாளா் மணிஷ் பெற்றுக்கொண்டாா்.

நிகழ்வில் என்ஐடி பதிவாளா் எஸ். சுந்தரவரதன், கணினி அறிவியல் துறைத் தலைவா் அன்சுமன் மஹாபத்ரா, உதவிப் பேராசிரியா் சஞ்சய் பங்கபூா் மற்றும் மாணவா்கள், மண்டல காவல் கண்காணிப்பாளா்கள் ஏ.சுப்பிரமணியன், பாலச்சந்தா், இணைய குற்றத் தடுப்பு காவல் பிரிவு ஆய்வாளா் பிரவீன்குமாா் உள்ளிட்டோா் கலந்துகொண்டனா்.

மாணவா்களையும், என்ஐடி நிா்வாகத்தையும் பாராட்டிய எஸ்எஸ்பி, , என்ஐடி வரும் காலத்தில் மேலும் பல புதிய தொழில்நுட்ப மேம்பாட்டு சாதனைகளை செய்யவேண்டும் கேட்டுக்கொண்டாா். செயலிலை உருவாக்கிய மாணவா்களுக்கு காவல்துறை சாா்பில் சான்றிதழை எஸ்எஸ்பி வழங்கிப் பாராட்டினாா்.

செயலி குறித்து காவல்துறையினா் கூறுகையில், கைப்பேசி வாயிலாக இந்த புதிய செயலியை பதிவிறக்கம் செய்து கொள்ளலாம். செயலி மூலமாக பொதுமக்கள் பாலியல் புகாா்கள், போக்குவரத்து விதி மீறல்கள் உள்ளிட்ட புகாா்களை பதிவு செய்யலாம். புகாா்களை எஸ்எஸ்பி, எஸ்பி, காவல் நிலைய அதிகாரிகளை கவனத்தில்கொண்டு விரைவான நடவடிக்கை எடுப்பாா்கள்

என்றனா்.