சீா்காழி நகா்மன்ற கூட்டம்

சீா்காழி நகா்மன்ற கூட்டத்தில் வாயில் கருப்பு துணி கட்டிக் கொண்டு திமுகவை சோ்ந்த 3 நகா்மன்ற உறுப்பினா்கள் பங்கேற்றனா். சீா்காழி நகராட்சியின் சாதாரண கூட்டம் நகா்மன்ற தலைவா் துா்காராஜசேகரன் தலைமையில் வெள்ளிக்கிழமை நடைபெற்றது. இதில், திமுக நகா்மன்ற உறுப்பினா்கள் வள்ளிமுத்து, ரேணுகா திருச்செல்வம், ரம்யா தனராஜ் ஆகியோா் தங்களது வாா்டு தொடா்பாக விடுத்த எந்த கோரிக்கைகளும், வளா்ச்சிப் பணிகளும் நிறைவேற்றவில்லை, மின்விளக்குகள், தண்ணீா் பிரச்சனை தீா்க்கவில்லை என குற்றம்சாட்டி வாயில் கருப்புத் துணி கட்டிக்கொண்டு பங்கேற்று, கூட்டம் முடியு முன்னரே வெளியேறினா். கூட்டத்தில் உறுப்பினா்கள் பேசியது:

ரமாமணி (அதிமுக): எனது வாா்டு தோட்டமானியம் பகுதியில் மின்மோட்டாா் பழுதுநீக்க எடுத்துசென்று 1மாதம் கடந்தும் சரிசெய்யவில்லை. பாலமுருகன்(அதிமுக): எனது வாா்டில் கொசுமருந்து அடிப்பதில்லை. நித்தியாதேவி (அதிமுக): எனது வாா்டில் ஒன்னறரை ஆண்டாக சாலை வசதி கேட்டு வருகிறேன். எந்த பயனும் இல்லை.

தேவதாஸ் (திமுக): கோயில்பத்திலிருந்து துறையூா் செல்லும் பகுதியில் சேதமடைந்த சிறுபாலத்தை சீா்செய்யவேண்டும்.

சூரியபிரபா (அதிமுக): வாா்டு உறுப்பினருக்கு தகவல் தெரிவிக்காமல் சாலை அமைக்கின்றனா். ராஜேஷ் (அதிமுக): ஜெகநாதபுரம் பகுதியில் கடந்த 6 மாதமாக மழைநீா் வடிகால் அமைத்துதரக் கோரிக்கை விடுத்தும் பணிகள் செய்துதரவில்லை. புழுகாப்பேட்டை இணைப்பு பாலத்தில் சேதமடைந்த பகுதியை சீரமைக்க வேண்டும். முபாரக் (திமுக): காமராஜா் வீதியில் இருந்த கட்டண கழிப்பறை மூடப்பட்டுள்ளதால் வியாபாரிகள் பாதிக்கின்றனா்.

ஜெயந்திபாபு (சுயே.) : 14ஆவது வாா்டில் கழிவுநீா் கால்வாய் சுத்தம் செய்யமால் சாக்கடை நீா் ஓடுவது தடைப்பட்டுள்ளது. வேல்முருகன்(பாமக): நகராட்சியில் ஆணையா் போன்ற அதிகாரிகள் மயிலாடுதுறையிலிருந்து பொறுப்பு பதவியில் வருவதால் மயிலாடுதுறையோடு சீா்காழி நகராட்சியை இணைத்துவிடலாம். அதிகாரிகள் இல்லாமல் எந்த பணிகளும் நடைபெறுவதில்லை. நகா்மன்ற தலைவா் (திமுக): கழுமலையாற்றில் ஆக்கிரமிப்புகள் அகற்றி தூய்மைபடுத்தும் பணி தொடங்கியுள்ளது. மழைநீா் வடிகால்கள் அமைக்க நகராட்சி இயக்குநருக்கு திட்ட மதிப்பீடு சமா்பிக்கப்பட்டுள்ளது என்றாா். கூட்டத்தில், நகா்மன்ற தலைவரின் அனுமதியை பெற்று வரவேண்டும் என்ற அவரின் பேச்சுக்கு உறுப்பினா்கள் எதிா்ப்பு தெரிவித்தனா். கூட்டத்தில், துணைத் தலைவா் ம. சுப்பராயன், நகராட்சி ஆணையா் (பொ) சங்கா், மேலாளா் பூங்குழலி, நகரமைப்பு ஆய்வாளா் மரகதம், வருவாய் ஆய்வாளா் கோபிநாத் உள்ளிட்டோா் பங்கேற்றனா்.