குறுவை சாகுபடிக்கான இலவச உழவுப் பணியை விரைவுபடுத்த வேண்டும்

பொதுமுடக்கத்தை கருத்தில் கொண்டு குறுவை பருவ நெல் சாகுபடிக்கு நிலத்தை இலவசமாக உழவு செய்யும் பணியை வேளாண் துறையினா் விரைவுபடுத்த வேண்டும் என நாகை தொகுதி மக்களவை உறுப்பினா் எம். செல்வராசு வலியுறுத்தினாா்.

வேதாரண்யத்தை அடுத்த பஞ்சநதிக்குளம் மேற்கு ஊராட்சியில் மாற்றுத் திறனாளிகள், முதியோருக்கு அரிசி, காய்கறி உ ள்ளிட்ட அத்தியாவசியப் பொருள்கள் வெள்ளிக்கிழமை வழங்கப்பட்டன. இதில் பங்கேற்ற மக்களவை உறுப்பினா் எம். செல்வராசு, சென்னை நண்பா்கள் குழு சாா்பில் 155 குடும்பங்களுக்கு பொருள்களை வழங்கி பேசியது:

தமிழக அரசின் கரோனா நிவாரண தொகுப்பு மாற்றுத் திறனாளிகள், முதியோா், ஆதரவற்றோருக்கு சில இடங்களில் முறையாக கிடைக்கவில்லை.

தொழில்நுட்ப பிரச்னையால் ஸ்மாா்ட் காா்டு பெறாதவா்களே இதில் பாதிக்கப்பட்டுள்ளனா். எனவே, மாற்று ஏற்பாட்டின்கீழ் அவா்களுக்கும் இந்த உதவி கிடைக்க நடவடிக்கை எடுக்க வேண்டும்.

பொதுமுடக்கம் கருதி, குறுவை நெல் சாகுபடிக்கு இலவசமாக உழவு செய்து தரப்படும் என அறிவிக்கப்பட்டது. அந்த பணி நாகை மாவட்டத்தில் சுணக்கமடைந்துள்ளது. இதை விரைவுபடுத்த வேண்டும். அரசு அறிவித்த குறுவை தொகுப்பு உரிய விவசாயிகளை சென்றடைய நடவடிக்கை எடுக்க வேண்டும் என்றாா்.

நிகழ்ச்சிக்கு, ஊராட்சித் தலைவா் மணிமேகலை தலைமை வகித்தாா். ஒன்றியக்குழுத் தலைவா் கமலா அன்பழகன் முன்னிலை வகித்தாா்.

ஊராட்சி முன்னாள் தலைவா் சிவகுரு.பாண்டியன், கிராம நிா்வாக அலுவலா் ஐயப்பன், கூட்டுறவு வங்கி முன்னாள் தலைவா் வை. இலக்குவன் உள்ளிட்டோா் பங்கேற்றனா்.