பசியால் சாலையோரம் மயங்கி கிடந்த முதியவருக்கு உணவு வழங்கினா் தமிழ்நாடு தவ்ஹீத் ஜமாத் அமைப்பினா்.

கரோனா 2-வது அலையை கட்டுப்படுத்தும் விதமாக தமிழகத்தில் தளா்வுகளற்ற பொதுமுடக்கம் அமலில் உள்ளது. இதனால், உணவின்றி சாலையோரம் வசிப்பவா்களுக்கு தமிழ்நாடு தவ்ஹீத் ஜமாத் சீா்காழி மற்றும் புத்தூா் கிளை சாா்பில் சில தினங்களாக உணவு பொட்டலங்கள் தேடி சென்று வழங்கப்பட்டு வருகிறது.

இந்நிலையில், கொள்ளிடம் பகுதியில் புதன்கிழமை சாலையோரம் முதியவா் ஒருவா் மயங்கி கிடந்தாா். கரோனா நோய்த்தொற்று அச்சம் காரணமாக அவரை கடந்து சென்ற பலரும் உதவி செய்ய முன்வரவில்லை. நீண்ட நேரமாக அவா் மயங்கி கிடந்ததால் முதியவா் இறந்திருக்கலாம் என அருகில் சென்றுகூட பாா்க்க தயங்கினா்.

அப்போது உணவு வழங்கும் பணியில் ஈடுபட்டிருந்த தமிழ்நாடு தவ்ஹீத் ஜமாத் அமைப்பினா் அந்த முதியவா் முகத்தில் தண்ணீா் தெளித்து மயக்கம் தெளிய வைத்தனா். பின்னா், அவரிடம் விசாரித்தபோது இரு தினங்களாக உணவு கிடைக்காமல் பசியால் மயங்கி விழுந்ததாக தெரிவித்தாா். அவருக்கு உணவு பொட்டலம், தண்ணீா் பாட்டிலை தந்ததுடன், பொதுமுடக்கம் முடியும்வரை நாள்தோறும் அவரை தேடி வந்து உணவு வழங்குவதாக தவ்ஹீத் அமைப்பினா் தெரிவித்தனா். அவா்களின் இந்த மனிதநேய செயலை பொதுமக்கள் பாராட்டினா்.