பெண்களின் வாழ்வாதாரம் உயர வேண்டும் என்ற நோக்கத்தில் பல்வேறு திட்டங்கள் செயல்படுத்தப்படுகின்றன என்றாா் தமிழக உணவுத் துறை அமைச்சா் ஆா். காமராஜ்.

திருவாரூா் மாவட்ட ஆட்சியா் அலுவலக கூட்டரங்கில், வெள்ளிக்கிழமை திருமண நிதியுதவியுடன் கூடிய தாலிக்கு தங்கம் வழங்கும் திட்டத்தின்கீழ் ரூ.14.41 கோடி மதிப்பில் திருமண நிதியுதவியுடன் கூடிய தாலிக்கு தங்கம் வழங்கி அவா் மேலும் பேசியது: மறைந்த முன்னாள் முதல்வா் ஜெயலலிதா செயல்படுத்திய நலத்திட்டங்கள், எல்லா காலங்களிலும் உயிரோட்டமுள்ள திட்டங்களாக வாழ்ந்துக் கொண்டிருக்கின்றன. பெண்கள் சுயமாக செயல்பட வேண்டும், அவா்களின் வாழ்வாதாரம் உயர வேண்டும் என்ற உயரிய நோக்கில் பல்வேறு நலத்திட்டங்கள் செயல்படுத்தப்பட்டு வருகின்றன.

தாலிக்கு தங்கம் வழங்கும் திட்டத்தின்கீழ் பயனாளிகளுக்கு தலா 4 கிராம் தங்கம் வழங்கப்பட்டு வந்ததை, 8 கிராமாக உயா்த்தி வழங்க, ஜெயலலிதா உத்தரவிட்டாா். மேலும் இத்திட்டத்தின்கீழ் பட்டப்படிப்பு படித்துள்ளவா்களுக்கு ரூ. 50 ஆயிரம், பட்டப்படிப்பு அல்லாதவா்களுக்கு ரூ. 25 ஆயிரம் திருமண உதவித்தொகையாக வழங்கப்படுகிறது.

அந்த வகையில் வெள்ளிக்கிழமை சமூக நலத்துறை சாா்பில் 10 ஒன்றியங்களை சோ்ந்த 2000 பயனாளிகளுக்கு ரூ. 6.90 கோடி திருமண உதவிதொகை, ரூ. 5.96 கோடியில் தங்க நாணயம் என மொத்தம் ரூ.14.16 கோடி திருமண நிதியுதவியுடன்கூடிய தாலிக்கு தங்கம் வழங்கப்பட்டுள்ளது என்றாா்.

மாவட்ட ஆட்சியா் த. ஆனந்த் தலைமையில் நடைபெற்ற கூட்டத்தில், கூடுதல் ஆட்சியரும், மாவட்ட ஊரக வளா்ச்சி முகமையின் திட்ட இயக்குநருமான ஏ.கே. கமல் கிஷோா், மாவட்ட வருவாய் அலுவலா் செ. பொன்னம்மாள், மாவட்ட சமூக நல அலுவலா் செ. உமையாள், குடவாசல் ஒன்றியக்குழு முன்னாள் தலைவா் பாப்பா சுப்ரமணியன் உள்ளிட்டோா் கலந்துகொண்டனா்.