நன்னிலத்தில் பல்வேறு கோரிக்கைகளை வலியுறுத்தி, வருவாய்த் துறை அலுவலா் சங்கம் சாா்பில் செவ்வாய்க்கிழமை ஆா்ப்பாட்டம் நடைபெற்றது.

கடலூா் வருவாய்த் துறை அலுவலா்கள் மீது எடுக்கப்பட்டுள்ள ஊழியா் விரோத மற்றும் பழிவாங்கும் நடவடிக்கைகளை ரத்து செய்ய வேண்டும். முதுநிலை வருவாய் ஆய்வாளா் பணி தொடா்பாக நீதிமன்ற தீா்ப்பின் அடிப்படையில் ஆணை வழங்கிடவேண்டும். வருவாய்த் துறை அலுவலா்களின் நீண்டநாள் கோரிக்கைகள் குறித்து அமைச்சா் தலைமையில் பேச்சுவாா்த்தை நடத்தி உடனடியாக தீா்வு காண வேண்டும் உள்ளிட்ட கோரிக்கைகளை வலியுறுத்தி இந்த ஆா்ப்பாட்டம் நடைபெற்றது.

தமிழ்நாடு வருவாய்த் துறை அலுவலா் சங்க நன்னிலம் வட்டச் செயலாளா் தெ. கருணாமூா்த்தி தலைமையில், வட்டாட்சியா் அலுவலகம் முன்பாக நடைபெற்ற ஆா்ப்பாட்டத்தில் கோரிக்கைகளை விளக்கி வட்டத் தலைவா் எம். ரவிச்சந்திரன் பேசினாா். இதில், வருவாய்த் துறை அலுவலா்கள் பலா் கலந்துகொண்டனா்.