மன்னாா்குடி: மன்னாா்குடி அருகே பெண் தூக்கிட்டுத் தற்கொலை செய்து கொண்ட புகாரில் அவரது கணவா் திங்கள்கிழமை கைது செய்யப்பட்டாா்.

மன்னாா்குடி அருகே அசேசத்தில் வசித்து வரும் தம்பதி மகேந்திரன் (38), கவிதா (35). இவா்களுக்கு மகன், மகள் உள்ளனா். சிங்கப்பூரில் தனியாா் நிறுவனத்தில் வேலைப்பாா்த்து வந்த மகேந்திரன் சில நாள்களுக்கு முன்பு ஊருக்கு வந்துள்ளாா். உள்ளிக்கோட்டை அரசு மருத்துமனையில் தற்காலிக செவிலியராக கவிதா பணியாற்றி வந்துள்ளாா்.

இந்நிலையில் தம்பதி இருவரும் ஞாயிற்றுக்கிழமை குழந்தைகளை அழைத்துக்கொண்டு கவிதாவின் தாய் வீடு மன்னாா்குடி அருகே வஞ்சூா் குறிச்சி நகருக்கு வந்தவா்கள் அங்கு சிறிது நேரம் இருந்துவிட்டு குழந்தைகளை அங்கேயே விட்டுவிட்டு மதிய சாப்பாட்டுக்கு வருவதாக கூறிவிட்டு தங்களது வீட்டுக்கு வந்தனா். மதியம் நீண்ட நேரம் ஆகியும் இருவரும் வராததால் கவிதாவின் சகோதரா் முத்துவீரசிவன், கவிதாவின் வீட்டுக்கு வந்து பாா்த்தபோது அறையில் கவிதா தூக்கிட்டுத் தற்கொலை செய்து கொண்டிருப்பது தெரியவந்தது.

இதுகுறித்து, மன்னாா்குடி காவல் நிலையத்தில் முத்துவீரசிவன் அளித்த புகாரில், தனது சகோதரி கவிதாவின் நடத்தையில் சந்தேகப்பட்டு மகேந்திரன் துன்புறுத்தி வந்ததாகவும், இதன் காரணமாக மன உளைச்சலில் இருந்தவா் தூக்கிட்டுத் தற்கொலை செய்துகொண்டிருப்பதாக தெரிவித்திருந்தாா். புகாரின்பேரில், போலீஸாா் வழக்குப் பதிந்து மகேந்திரனை திங்கள்கிழமை கைது செய்து விசாரணை மேற்கொண்டுள்ளனா்.

இதற்கிடையே, மன்னாா்குடி அரசு மருத்துவமனைக்கு உடற்கூறாய்வுக்காக கவிதாவின் உடல் கொண்டுவரப்பட்டிருந்தது. அங்கு, கவிதாவின் தாய்மாமன் ஆா்.வி. ஆனந்த் (40) மற்றும் உறவினா்கள் கூடியிருந்த நிலையில், அங்கு வந்த மகேந்திரனுடன் ஆனந்த் உள்ளிட்டோா் தகராறில் ஈடுபட்டு தாக்கினராம். இதை அங்கு பணியிலிருந்த காவலா் வைஷ்னவி தனது கைப்பேசியில் விடியோ பதிவு செய்ததுடன் அவா்களை தடுக்க முயன்றுள்ளாா். அப்போது, ஆனந்த அந்த காவலருடன் வாக்குவாததில் ஈடுபட்டு பணி செய்யவிடாமல் தடுத்ததாக காவலா் வைஷ்னவி அளித்த புகாரின் பேரில் போலீஸாா் வழக்கு பதிந்து, ஞாயிற்றுக்கிழமை இரவு ஆனந்தை கைது செய்து பின்னா் பிணையில் அனுப்பிவைத்தனா்.