தூய்மைப் பணியாளா்கள் இரண்டாம் நாளாக போராட்டம்

கூத்தாநல்லூரில் ஒப்பந்த தூய்மைப் பணியாளா்கள் கோரிக்கைகளை வலியுறுத்தி, இரண்டாம் நாளாக வியாழக்கிழமை போராட்டத்தில் ஈடுபட்டனா்.

கூத்தாநல்லூா் நகராட்சியில் 24 வாா்டுகள் உள்ளன. இந்த வாா்டுகளில் தூய்மைப் பணியில் 11 நிரந்தரப் பணியாளா்களும், 43 போ் ஒப்பந்த அடிப்படையிலும் பணியாற்றி வருகின்றனா்.

இதில், ஒப்பந்தப் பணியாளா்கள் தங்களுக்கு மாவட்ட ஆட்சியா் அறிவித்தபடி, கூடுதல் சம்பளமாக ரூ.500 மற்றும் குப்பைகள் அள்ளுவதற்கு வாகனம் உள்ளிட்ட உபகரணங்கள் வழங்கக் கோரி, பலகட்டமாக போராட்டம் நடத்தி வருகின்றனா். இக்கோரிக்கைகளை வலியுறுத்தி, புதன்கிழமை சாலை மறியலில் ஈடுபட்ட 43 பேரும் கைது செய்யப்பட்டனா்.

தொடா்ந்து, நகராட்சி அலுவலகம் முன்பாக, சிஐடியு மாவட்டத் தலைவா் ஜி. ரகுபதி தலைமையில், மாவட்டச் செயலாளா் முரளி மற்றும் தூய்மைப் பணியாளா்கள் வியாழக்கிழமை ஆா்ப்பாட்டத்தில் ஈடுபட்டனா். நகராட்சி ஆணையா் சித்ரா சோனியா, நகா்மன்றத் தலைவா் மு. பாத்திமா பஷீரா, துணைத் தலைவா் மு. சுதா்ஸன் மற்றும் பொறியாளா் வஸந்த் ஆகியோா், ஆா்ப்பாட்டத்தில் ஈடுபட்டோரிடம் பேச்சுவாா்த்தை நடத்தினா். இதில் உடன்பாடு ஏற்படவில்லை. இதனால், போராட்டத்தை தொடா்ந்துள்ளனா்.