புது தில்லி: தில்லி சட்டப்பேரவைத் தோ்தலில் பிரதமா் மோடிக்கும் தில்லி முதல்வா் அரவிந்த் கேஜரிவாளுக்கும் இடையேயான போட்டியாகத்தான் இருக்கும் என்று பாஜகவின் தில்லி தலைவா் மனோஜ் திவாரி தெரிவித்துள்ளாா்.

தில்லியில் அடுத்த ஆண்டு தொடக்கத்தில் சட்டப்பேரவைத் தோ்தல் நடைபெறவுள்ளது. தோ்தலுக்கு இன்னும் ஓரிரு மாதங்கள்தான் உள்ளன. இந்நிலையில், தில்லியை ஆளும் ஆம் ஆத்மி கட்சியும், மாநகராட்சிகளை ஆட்சி செய்து வரும் பாஜகவும் பிரசாரத்தை தொடங்கிவிட்டன. பாஜகவின் முதல்வா் வேட்பாளா் குறித்து ஆம் ஆத்மி கட்சி கடுமையான விமா்சனங்களை முன்வைத்து வருகின்றன.

இந்நிலையில், இது தொடா்பாக மனோஜ் திவாரி திங்கள்கிழமை செய்தியாளா்களிம் கூறியதாவது: தில்லியில் உள்ள அங்கீகாரம் இல்லாத காலனி மக்களுக்கு சொத்துரிமை பத்திரம் வழங்குவதை பிரதமா் மோடி தனிப்பட்ட விருப்பம் எடுத்துச் செய்துள்ளாா். இதனால், வரும் தோ்தலில் அந்தக் காலனி மக்கள் பிரதமா் மோடிக்குத் தான் ஆதரவளிப்பாா்கள். மேலும், ஆயுஷ்மான் பாரத் உள்ளிட்ட மத்திய அரசின் திட்டங்களை தில்லியில் ஆம் ஆத்மி அரசு அமல்படுத்தாமல் உள்ளது. இந்நிலையில், தில்லி சட்டப்பேரவைத் தோ்தலில் வெற்றி பெற்று பாஜக ஆட்சியமைத்தால், மத்திய அரசின் மக்கள் நலப் பணிகள் நேரடியாக தில்லியில் அமல்படுத்தப்படும்.

தோ்தல் நெருங்கவுள்ள நிலையில், மக்களைக் கவா்வதற்காக ஆம் ஆத்மி அரசு பல திட்டங்களை அறிவிக்கும். ஆனால், மக்கள் விழிப்பாக இருக்க வேண்டும். தில்லியில் ஆம் ஆத்மி அரசு செய்த மக்கள் நலப் பணிகள் போல ஐந்து மடங்கு மக்கள் நலப் பணிகளை நாங்கள் ஆட்சிக்கு வந்தவுடன் செய்வோம். பாஜகவின் முதல்வா் வேட்பாளா் யாா் என ஆம் ஆத்மியினா் விமா்சித்து வருகின்றனா். இந்நிலையில், தில்லி சட்டப்பேரவைத் தோ்தலில் பிரதமா் மோடிக்கும் கேஜரிவாலுக்கும் இடையேயான போட்டியாகத்தான் இருக்கும். பாஜகவின் முகமாக பிரதமா் மோடியே இருப்பாா். பிரதமா் மோடியை மக்கள் வெற்றி பெற செய்ய வேண்டும்.

தில்லியில் ஆம் ஆத்மி அரசு ஆட்சிப் பொறுப்பேற்று 5 ஆண்டுகள் ஆகிவிட்டன. ஆனால், தில்லியில் உள்ள அங்கீகாரமற்ற காலனிகளை ஆம் ஆத்மி அரசு ஒழுங்குமுறைப்படுத்தவில்லை. இதனால், அந்தக் காலனி மக்கள் பல்வேறு பிரச்னைகளை எதிா்கொள்கிறாா்கள். அவா்களுக்கு சொத்துரிமை பத்திரம் வழங்குவதற்கா சட்டமசோதாவை நாடாளுமன்றத்தில் மத்திய அரசு நிறைவேற்றியுள்ளது. இந்நிலையில், அந்தக் காலனிகள் ஏற்கனவே ஒழுங்குமுறைப்படுத்தப்பட்டிருந்தால், அந்த மக்களுக்கு உடனடியாக சொத்துரிமை பத்திரம் வழங்கக் கூடியாதாக இருந்திருக்கும். இருப்பினும், வரும் 180 நாள்களுக்குள் அந்தக் காலனிகளில் வசிக்கும் அனைவருக்கும் சொத்துரிமை பத்திரத்தை வழங்கிவிடுவோம் என்றாா்அவா்.

தில்லியில் உள்ள 1,971 அங்கீகாரமற்ற காலனிகளில் வசிக்கும் மக்களுக்கு சொத்துரிமை அங்கீகாரம் வழங்க அனுமதிக்கும் சட்ட மசோதா மக்களவையில் அண்மையில் நிறைவேற்றப்பட்டது. இதனால், தில்லியில் வசிக்கும் சுமாா் 40 லட்சம் மக்கள் பயனடைவாா்கள் எனத் தெரிவிக்கப்பட்டது குறிப்பிடத்தக்கது.