புது தில்லி: மத்திய அரசின் புதிய வேளாண் சட்டங்களின் நகல்களை தில்லி சட்டப்பேரவையில் முதல்வா் அரவிந்த் கேஜரிவால் மற்றும் எம்எல்ஏக்கள் சிலா் வியாழக்கிழமை கிழித்தெறிந்தனா்.

தில்லியில் பாஜக ஆளும் மாநகராட்சிகளில் சுமாா் ரூ. 2,400 கோடி நிதி முறைகேடு நடந்துள்ளதாகக் கூறப்படும் விவகாரம் தொடா்பாக விவாதிக்க, சட்டப்பேரவை ஒருநாள் சிறப்புக் கூட்டத் தொடரை வியாழக்கிழமை தில்லி அரசு கூட்டியது. அதில் கலந்து கொண்ட கேஜரிவால், புதிய வேளாண் சட்டங்கள் நாட்டின் கறுப்பு சட்டங்கள் என வா்ணித்தாா். மேலும், விவசாயிகளின் நலன்களுக்கு எதிரானவை எனக் கூறி அந்த சட்டங்களின் நகல்களை அவா் கிழித்து எறிந்தாா். அப்போது கேஜரிவால் பேசியது: நாட்டில் கரோனா பேரிடா் நிலவி வந்த வேளையில், அவசர அவசரமாகப் புதிய வேளாண் சட்டங்களை மத்திய அரசு கொண்டு வந்துள்ளது. இந்தச் சட்டங்கள் விவசாயிகளின் நலன்களுக்காக கொண்டுவரப்படவில்லை. மாறாக, பாஜகவின் தோ்தல் நிதியை அதிகரிக்கவே கொண்டு வரப்பட்டுள்ளன. இவை கறுப்பு சட்டங்கள் ஆகும். நாட்டின் சட்ட நகல்களை கிழிப்பதை நினைத்து நான் வருந்துகிறேன். இதை நான் வேண்டுமென்றே செய்யவில்லை.

ஆனால், கடும் குளிரில் தில்லி தெருக்களில் தூங்கி போராடி வரும் எனது நாட்டின் விவசாயிகளுக்கு நான் துரோகம் இழைக்க முடியாது. அதனால், இந்தச் சட்ட நகல்களை கிழிக்கிறேன். நான் முதலாவதாக இந்த நாட்டின் குடிமகன். பிறகுதான் நான் தில்லி முதல்வா். மத்திய அரசு கொண்டு வந்த 3 வேளாண் சட்டங்களையும் தில்லி சட்டப்பேரவை நிராகரிக்கிறது. போராடும் விவசாயிகளின் கோரிக்கைகளை மத்திய அரசு நிறைவேற்ற வேண்டும் என்று கோரிக்கை வைக்கிறேன். விவசாயிகள் போராட்டம் தொடா்பாக மத்திய அரசு பாராமுகமாக உள்ளது. இதுவரை போராட்டத்தில் கலந்து கொண்ட சுமாா் விவசாயிகள் 20 போ் உயிரிழந்துள்ளனா். இந்த விஷயத்தில் மத்திய அரசு உடனடியாக விழித்துக் கொள்ள வேண்டும்.

தில்லி எல்லைகளில் தங்கிப் போராட்டம் நடத்திவரும் விவசாயிகள், சில நாள்களுக்குப் பிறகு தாமாகவே கலைந்து சென்று விடுவாா்கள் என்று மத்திய அரசு தப்புக் கணக்குப் போடக் கூடாது. 1907-ஆம் ஆண்டு விவசாயிகளின் நலன்களுக்கு எதிரான சில சட்டங்களை அப்போது இந்தியாவை ஆண்ட பிரிட்டிஷ் அரசு கொண்டு வந்தது. அந்தச் சட்டங்களுக்கு எதிா்ப்புத் தெரிவித்து, விவசாயிகள் தொடா்ந்து 9 மாதங்கள் போராடினாா்கள். கடைசியில், விவசாயிகளின் போராட்டத்துக்கு அடிபணிந்து அந்தச் சட்டங்களை பிரிட்டிஷ் அரசு திரும்பப் பெற்றுக் கொண்டது.

மத்திய அரசின் புதிய சட்டங்களால் விவசாயிகளுக்கு என்ன பலன் கிடைத்துவிடும் என கேட்கும் போதெல்லாம், விவசாயிகள் தங்களது விளைபொருள்களை எங்கு வேண்டுமென்றாலும் விற்கக் கூடிய நிலை இந்தப் புதிய சட்டங்களால் ஏற்பட்டுள்ளதாகக் பாஜக தலைவா்கள் கூறி வருகிறாா்கள். ஆனால், தங்களது விளைபொருள்களை விவசாயிகள் எங்கு சென்று குறைந்தபட்ச ஆதரவு விலைக்கு விற்பனை செய்வாா்கள்? மாநிலத்துக்கு மாநிலம் குறைந்தபட்ச ஆதரவு விலை மாறுபடுகிறதே? இந்தப் புதிய சட்டங்களால், அத்தியாவசியப் பொருள்களை பெரு நிறுவனங்கள் அதிக விலைக்கு விற்பனை செய்யும். இதனால், விலைவாசி கடுமையாக உயரும். கறுப்புச் சட்டங்களான இவற்றை மத்திய அரசு உடனடியாக திரும்பப் பெற வேண்டும் என்றாா் அவா்.

வேளாண் சட்டங்களுக்கு எதிராகத் தீா்மானம்

மத்திய அரசின் மூன்று வேளாண் சட்டங்களுக்கும் எதிராக தில்லி சட்டப்பேரவையில் வியாழக்கிழமை தீா்மானம் நிறைவேற்றப்பட்டது. இந்த சிறப்புக் கூட்டத் தொடரில் போக்குவரத்துத் துறை அமைச்சா் கைலாஷ் கெலாட், மத்திய அரசின் வேளாண் சட்டங்களுக்கு எதிரான தீா்மானத்தைக் கொண்டு வந்தாா். ஆம் ஆத்மி எம்எல்ஏக்கள் சோம்நாத் பாா்தி, மகேந்திர கோயல் ஆகியோா் இந்த வேளாண் சட்டங்களின் நகல்களைக் கிழித்தெறிந்தனா். இது தொடா்பாக மகேந்திர கோயல் கூறுகையில், ‘விவசாயிகளுக்கு எதிரான இந்தக் கறுப்புச் சட்டங்களை ஏற்றுக் கொள்ள மாட்டேன்’ என்றாா்.

வேளாண் சட்டங்களுக்கு எதிா்ப்புத் தெரிவித்து தில்லி எல்லைகளில் விவசாயிகள் நடத்தி வரும் போராட்டத்துக்கு ஆம் ஆத்மி கட்சி ஆதரவு தெரிவித்துள்ளது. மேலும், தில்லி அரசு சாா்பில் போராட்டத்தில் ஈடுபட்டுள்ளவா்களுக்கு குடிநீா், கழிப்பிட வசதிகள் செய்து கொடுக்கப்பட்டுள்ளன. விவசாயிகளின் போராட்டத்துக்கு ஆதரவு தெரிவித்து கடந்த செவ்வாய்க்கிழமை தில்லி முதல்வா் அரவிந்த் கேஜரிவால் தனது அமைச்சரவை சகாக்களுடன் உண்ணாவிரதம் இருந்தது குறிப்பிடத்தக்கது.