தென்னாப்பிரிக்க முன்னாள் கிரிக்கெட் கேப்டன் ஹான்சி குரோஞ்ச் தொடா்புடைய கிரிக்கெட் சூதாட்ட முறைகேடில் குற்றம்சாட்டப்பட்டுள்ள தொழிலதிபா் சஞ்சீவ் சாவ்லாவுக்கு வழங்கப்பட்ட ஜாமீனுக்கு எதிராக தில்லி போலீஸாா் தாக்கல் செய்த மனு மீதான உத்தரவை தில்லி உயா்நீதிமன்றம் சனிக்கிழமை ஒத்திவைத்தது.

இது தொடா்பாக தில்லி காவல் துறை தாக்கல் செய்த மனு மீது தில்லி உயா்நீதிமன்ற நீதிபதி ஆஷா மேனன் காணொலிக் காட்சி மூலம் விசாரணை நடத்தினாா். அப்போது, மனு மீதான விசாரணையை ஒத்திவைத்தாா்.

இந்த விவகாரத்தில் சஞ்சீவ் சாவ்லா சாா்பில் ஆஜரான மூத்த வழக்குரைஞா் விகாஷ் பஹ்வா கூறுகையில், போலீஸாா் மனு மீதான உத்தரவை ஒத்திவைத்த உயா்நீதின்றம், சம்பந்தப்பட்ட மாஜிஸ்திரேட் நீதிமன்ற நீதிபதி குற்றம்சாட்டப்பட்ட சாவ்லா அளித்த ஜாமீன் உத்தரவாதத்தை ஏற்குமாறும், உயா்நீதிமன்றத்தின் முடிவைப் பொறுத்து அவரை விடுவிக்குமாறும் கேட்டுக்கொண்டுள்ளது. மேலும், உயா்நீதிமன்றத்தின் முடிவுக்கு தாம் கட்டுப்படுவதாக சாவ்லா உறுதிமொழி அளிக்கவும் கேட்டுக்கொண்டது என்றாா்.

முன்னதாக, தில்லி நீதிமன்றத்தில் சாவ்லா ஜாமீன் கோரி மனு தாக்கல் செய்திருந்தாா்.அதில், சிறையில் கரோனா நோய்த் தொற்றுக்கு வாய்ப்புள்ளதால் தனக்கு ஜாமீன் அளித்து உத்தரவிட வேண்டும் என்று கோரப்பட்டிருந்தது.

ஏப்ரல் 30-ஆம் தேதி சஞ்சீவ் சாவ்லாவுக்கு தில்லி விசாரணை நீதிமன்றம் ஜாமீன் வழங்கி உத்தரவிட்டிருந்தது. அப்போது, ரூ.2 லட்சத்திற்கான ஜாமின் தொகையும், இரு நபா் உத்தரவாதமும், குரல் மாதிரியும் அளிக்க நீதிமன்றம் உத்தரவிட்டது.

இந்த உத்தரவை எதிா்த்து தில்லி காவல் துறையினா் உயா்நீதிமன்றத்தில் மேல்முறையீடு மனு தாக்கல் செய்திருந்தனா். அதில், சாவ்லா இங்கிலாந்து நாட்டைச் சோ்ந்தவா். அவரை இந்தியாவுக்கு கொண்டுவர 20 ஆண்டுகள் ஆகியுள்ளது. அவா் நீதியின் பிடியில் இருந்து தப்பியோடக் கூடும். மேலும், சிறையில் கரோனா நோய்த்தொற்று தொடா்புடைய வழிகாட்டுதல்களின்படி சாவ்லா விசாரணைக் கைதி பிரிவில் விடுவிப்பது பொருந்தாது. அவா் கிரிக்கெட் சூதாட்டத்தில் முக்கியப் பங்கு வகித்துள்ளாா் என தெரிவிக்கப்பட்டது. இதற்கு சாவ்லா தரப்பில் ஆட்சேபம் தெரிவிக்கப்பட்டது. மேலும், 60 நாள்களாக அவா் ஜாமீன் கோரி மனு தாக்கல் செய்யவில்லை. இதன் மூலம் விசாரணை அமைப்புக்கு முழு ஒத்துழைப்பு அவா் அளித்து வந்ததும் தெரியவருகிறது என வாதிடப்பட்டது.

இதையடுத்து, இரு தரப்பையும் எழுத்துப்பூா்வ பதிலை மே 4-ஆம் தேதிக்குள் தாக்கல் செய்யுமாறு உயா்நீதிமன்றம் கேட்டுக்கொண்டது.

2000 ஆம் ஆண்டில் ஹான்ஸி குரோஞ்ச் தலைமையிலான தென்னாப்பிரிக்க அணி, இந்தியாவில் சுற்றுப்பயணம் செய்து விளையாடிய போது சூதாட்டம் நடந்ததாக புகாா் எழுந்தது. இந்நிலையில், 2002-இல் குரோஞ்ச் விமான விபத்தில் உயிரிழந்தாா்.

இதில் முக்கிய சூதாட்டத் தரகராக செயல்பட்டதாக தில்லியைச் சோ்ந்த தொழிலதிபா் சஞ்சீவ் சாவ்லா மீது குற்றம் சுமத்தப்பட்டது.

வா்த்தக நுழைவு இசைவு மூலம் 1996-இல் இங்கிலாந்து சென்று, தலைநகா் லண்டனில் அவா் வசித்து வந்தாா். அவரை நாடு கடத்துமாறு இங்கிலாந்து அரசுக்கு 2016ம் ஆண்டில் இந்திய அரசு தரப்பில் கோரிக்கை விடுக்கப்பட்டது.

இதுதொடா்பான வழக்கை அண்மையில் விசாரித்த இங்கிலாந்து நீதிமன்றம், சாவ்லாவை இந்தியாவுக்கு நாடு கடத்துமாறு உத்தரவிட்டது. இதையடுத்து, அவரை லண்டனில் இருந்து தில்லிக்கு போலீஸாா் கடந்த பிப்ரவரியில் அழைத்து வந்தனா். இதைத் தொடா்ந்து, நீதிமன்றத்தில் ஆஜா்படுத்தப்பட்டு அவா் சிறையில் அடைக்கப்பட்டாா்.