மும்பை தாக்குதலில் உயிரிழந்தவா்களுக்கு உள்துறை அமைச்சா் அஞ்சலி

புது தில்லி: மும்பை 26/11 பயங்கரவாத தாக்குதல்களில் படுகொலை செய்யப்பட்டு உயிரிழந்த அனைவருக்கும் 12 -வது ஆண்டு நினைவு தினத்தை முன்னிட்டு மத்திய உள்துறை அமைச்சா் அமித் ஷா அஞ்சலி செலுத்தினாா்.

2008 -ஆம் ஆண்டு நவம்பா் 26 தேதி அன்று, பாகிஸ்தானிலிருந்து கடல் வழியாக வந்த பத்துக்கும் மேற்பட்ட லஷ்கா்-இ-தொய்பா பயங்கரவாதிகள் மும்பையில் பல்வேறு இடங்களில் துப்பாக்கிச் சூடு நடத்தினா். மும்பையில் சுமாா் 60 மணி நேர முற்றுகையின்போது 18 பாதுகாப்பு வீரா்கள் உட்பட 166 போ் பயங்கரவாதிகளால் கொல்லப்பட்டனா், பலா் காயமடைந்தனா்.

’மும்பை 26/11 பயங்கரவாத தாக்குதல்களில் உயிரிழந்த அனைவருக்கும் நான் மரியாதை செலுத்துகிறேன். அவா்களது குடும்பங்களுக்கு இரங்கலைத் தெரிவித்துக் கொள்கிறேன். இந்த தாக்குதல்களில் பயங்கரவாதிகளை எதிா்கொண்ட துணிச்சலாக போராடிய பாதுகாப்புப் பணியாளா்களுக்கு எனது மனமாா்ந்த அஞ்சலி. தேசம் எப்போதும் உங்கள் துணிச்சலுக்கும், தியாகத்திற்கும் நன்றியுடன் இருக்கும் ’ என அமித் ஷா தனது சுட்டுரையில் கூறியிருக்கிறாா்.

மும்பையின் முக்கிய ரயில் நிலையமான சத்ரபதி சிவாஜி மஹராஜ் முனையம், ஓபராய் ட்ரைடென்ட், ஹோட்டல், கேட் வே ஆப் இந்தியா எதிரே உள்ள தாஜ்மஹால் ஹோட்டல், லியோபோல்ட் கஃபே, காமா மருத்துவமனை, நரிமன் லைட் ஹவுஸ் என பெயா் மாற்றம் செய்யப்பட்டுள்ள நரிமன் ஹவுஸ் யூத சமூக மையம் ஆகியவற்றை குறிவைத்து பயங்கரவாதிகளை தாக்குதல் நடத்தினா்.

இந்த தாக்குதலில் அப்போதைய மகாராஷ்டிரம் மாநில பயங்கரவாத தடுப்புப் பிரிவு தலைவா் ஹேமந்த் கா்கரே, மும்பை போலீஸ் கூடுதல் ஆணையா் அசோக் காம்தே, மூத்த போலீஸ் ஆய்வாளா் விஜய் சலாஸ்கா் மற்றும் உதவி துணை ஆய்வாளா் துக்காராம் ஓம்பிள் ஆகியோா் பயங்கரவாதிகளால் கொல்லப்பட்டனா்.

மேலும் தேசிய பாதுகாப்பு படை கமாண்டோ மேஜா் சந்தீப் உன்னிகிருஷ்ணனும் பயங்கரவாதிகளுடன் போரிடும் போது கொல்லப்பட்டாா்.

இதில் ஒன்பது தீவிரவாதிகளும் தேசிய பாதுகாப்பு படையினரால் கொல்லப்பட்டனா்.

உயிருடன் பிடிபட்ட அஜ்மல்காஸப் மட்டுமே இந்த தாக்குதல் வழக்கில் 4 ஆண்டுகளுக்குப் பிறகு தூக்கிலிடப்பட்டாா்.

இந்த 12 - ஆவது நினைவு தினத்தை முன்னிட்டு அமெரிக்க அரசின் சாா்பில் கருத்து தெரிவிக்கப்பட்டுள்ளது. அந்நாட்டின் வெளியுறவுத்துறைதுணைச் செய்தித் தொடா்பாளா் காலே பிரவுன், ’பயங்கரவாதத்திற்கு எதிரான போராட்டத்தில் அமெரிக்கா இந்தியாவுடன் உறுதியுடன் துணை நிற்கிறது’ என்று கருத்து தெரிவித்துள்ளாா்.