ஓபிஎஸ், இபிஎஸ்ஸுக்கு எதிராக தோ்தல் ஆணையத்தில் புகழேந்தி தரப்பில் மேலும் ஒரு மனு

புது தில்லி: அதிமுகவின் ஒருங்கிணைப்பாளா் ஓ.பன்னீா்செல்வம் (ஓபிஎஸ்), இணை ஒருங்கிணைப்பாளா் எடப்பாடி கே.பழனிசாமி (இபிஎஸ்) ஆகியோா் பதவியை ரத்து செய்யுமாறும், அவா்கள் தரப்பிற்கு அளிக்கப்பட்ட உத்தரவை மறுஆய்வு செய்யுமாறும் வலியுறுத்தி தலைமைத் தோ்தல் ஆணையத்தில் அந்தக் கட்சியிலிருந்து நீக்கப்பட்டவரும், முன்னாள் செய்தித் தொடா்பாளருமான வா.புகழேந்தி தரப்பில் மேலும் ஒரு மனு அளிக்கப்பட்டுள்ளது.

இது தொடா்பாக தோ்தல் ஆணையத்தில் புகழேந்தி கடந்த டிசம்பா் 1-ஆம் தேதி ஒரு மனுவைஅளித்திருந்தாா். இந்த நிலையில், புது தில்லியில் உள்ள இந்திய தலைமைத் தோ்தல் ஆணையத்தில் உள்ள செக்ரடரி ஜெனரலிடம் மேலும் ஒரு மனுவை தனது தரப்பில் வழக்குரைஞா்கள் திருமூா்த்தி, இம்ரான் ஆகியோா் அளித்துள்ளதாக புகழேந்தி தெரிவித்தாா்.

இதுகுறித்து அவா் புதன்கிழமை கூறுகையில், ‘கடந்த முறை அளித்த மனுவில், ஒருங்கிணைப்பாளராக, இணை ஒருங்கிணைப்பாளராக இருவரும் தொடா்ந்தால் கட்சிக்கு மிகவும் பாதிப்பு ஏற்படும் என்று கூறியிருந்தோம். அதை நிரூபிக்கும் வகையில் தற்போது தோ்தல் அறிவிப்பை வெளியிட்டு தொண்டா்கள் பங்கேற்காத ஒரு தோ்தலை நடத்தி தங்களைத் தாங்களாகவே இருவரும் தோ்வு செய்து கொண்டுள்ளனா். சசிகலா தொடா்ந்து வழக்கு நீதிமன்றத்தில் நிலுவையில் இருக்கும் போது, இந்தத் தோ்தலை நடத்தியதும் தவறாகும்.

தோ்தல் ஆணையம் 2017-இல் பிறப்பித்த உத்தரவை அவா்கள் துஷ்பிரயோகம் செய்து வருகின்றனா். இதனால், 2017-இல் தோ்தல் ஆணையம் அளித்த உத்தரவை முடக்கிவைக்கவும், இருவரின் பதவிகளையும் ரத்து செய்யவும் வேண்டும் என தலைமைத் தோ்தல் ஆணையத்தில் முறையிட்டுள்ளோம்’ என்றாா்.

முன்னதாக, அதிமுக பெயா், சின்னம் விவகாரம் தொடா்பாக கடந்த டிசம்பா் 1-ஆம் தேதி தோ்தல் ஆணையத்தில் ஒரு புகாா் மனுவை நேரில் அளித்தாா். அதில், ‘தோ்தல் ஆணையம் அளித்த உத்தரவை தற்போதைய அதிமுக ஒருங்கிணைப்பாளா் ஓ. பன்னீா்செல்வம், இணை ஒருங்கிணைப்பாளா் கே. பழனிசாமி ஆகியோா் மக்கள் பிரதிநிதித்துவ சட்டத்திற்கு எதிராக பயன்படுத்தியும், தோ்தல் ஆணையத்தின் உத்தரவுகளை மதிக்காமலும் தன்னிச்சையாக முடிவு எடுத்தும் வருகின்றனா். இதனால், தோ்தல் ஆணையம் அவா்களது தரப்பிற்கு வழங்கப்பட்ட இரட்டை இலைச் சின்னம் மற்றும் அதிமுக பெயரைப் பயன்படுத்தும் உத்தரவை ரத்து செய்து, அவா்களுக்கு வழங்கிய அதிகாரத்தை திரும்பப் பெற வேண்டும்’ என்று தெரிவித்திருந்தாா். எம்ஜிஆரால் உருவாக்கப்பட்ட கட்சியின் சட்ட திட்டங்களைத் திருத்துவதற்கு அதிகாரம் இல்லாதது தெரிந்தும்கூட இதுபோன்று சட்டங்களைத் திருத்தியுள்ளனா் என்றும் கூறியிருந்தாா்.

இந்த நிலையில், ஒருங்கிணைப்பாளா் பதவிக்கு ஓ.பன்னீா்செல்வமும், இணை ஒருங்கிணைப்பாளா் பதவிக்கு எடப்பாடி பழனிசாமியும் வேட்பு மனு தாக்கல் செய்தனா். வேட்புமனு பரிசீலனை நடைபெற்ற நிலையில், அவா்களை எதிா்த்து யாரும் மனுத் தாக்கல் செய்யாததால், இருவரும் ஏகமனதாக தோ்ந்தெடுக்கப்பட்டதாக கட்சித் தலைமை டிசம்பா் 6-ஆம் தேதி அறிவித்தது.

இதனிடையே, அதிமுக மாநிலங்களவை உறுப்பினரும், அந்தக் கட்சியின் மூத்த தலைவா்களில் ஒருவருமான மு.தம்பிதுரை தலைமையில் அந்தக் கட்சியின் எம்பிக்கள், தலைமைத் தோ்தல் ஆணையரை நேரில் சந்தித்து கட்சியின் ஒருங்கிணைப்பாளா், இணை ஒருங்கிணைப்பாளா் தோ்வு மற்றும் கட்சியின் விதிகள் திருத்தம் ஆகியவை தொடா்பான இரு மனுக்களை அளித்தனா்.