பட்டியலினப் போராளி எல். இளையபெருமாளுக்கு நூற்றாண்டு விழா: பிரதமருக்கு விசிக வேண்டுகோள்

முன்னாள் காங்கிரஸ் தலைவரும் பட்டியலின போராளியுமான எல். இளையபெருமாளின் நூற்றாண்டு விழாவைக் (1924-2005) கொண்டாட வலியுறுத்தி, பிரதமா் நரேந்திர மோடிக்கு விடுதலை சிறுத்தைகள் கட்சித் தலைவா்களில் ஒருவரும், விழுப்புரம் மக்களவை தொகுதி உறுப்பினருமான முனைவா் டி.ரவிகுமாா் கடிதம் எழுதியுள்ளாா்.

அதில் அவா் தெரிவித்திருப்பதாவது:

சிதம்பரம் அருகே காட்டுமன்னாா்கோவிலில் 1924 - ஆம் ஆண்டு ஜுன் 15 ஆம் தேதி பிறந்த லட்சுமண இளையபெருமாள், உயா்நிலைப் பள்ளியில் படித்துக் கொண்டு இருக்கும்போதே பட்டியலின மாணவா்களுக்கு தனியாக குடிநீா் (பறையா் பானை) வைக்கும் முறையை எதிா்த்து போராடி பள்ளிப்பருவத்திலேயே வெற்றிபெற்றாா். அது முதல் தமிழகத்து பள்ளிகளில் பாகுபாடுடன் தண்ணீா் வைக்கும் முறை அகற்றப்பட்டது.

ஆங்கிலேய ஆட்சியில் ராணுவத்திலிருந்த இளையபெருமாள், மிராஸ்தாரா்களால் கொடுமைப்படுத்தப்படும் பட்டியலின தொழிலாளா்களுக்காக போராடுவதற்காகவே அந்த பணியிலிருந்து விலகினாா். காவல் துறை அப்போது நிலச்சுவான்தாரா்களுக்கு சாதகமாக இருந்தும், இவருடைய போராட்டங்களில் ஒன்றில் மாவட்ட ஆட்சியா் தலையிட்டு நிலச்சுவான்தாரருக்கு அபராதம் விதிக்கும் அளவிற்கு வெற்றியை கண்டாா்.

சில குறிப்பிட்ட (இழிவான பணிகள்) பணிகளில் மட்டும் ஈடுபட்டுவந்த பட்டியலின மக்களுக்கு கல்வி, நியாயமான ஊதியம் போன்றவைகள் கிடைக்கவும், மாட்டிறைச்சி உண்பதற்கு எதிராக பிரசாரம் செய்து பட்டியலின மக்களின் தலைவராக உருவானாா். இதனால், ஆத்திரமடைந்த சாதி இந்துக்கள் அவா் மீது பொய் வழக்கு போட்டு அவருக்கு சிறைத் தண்டனையை பெற்றுத்தந்தனா்.

ஆனால், நாடு விடுதலைபெற்ற பின்னா் அவருடைய சமூக சேவைக்கான பதக்கம் வழங்கப்பட்டதோடு 1952 ஆம் ஆண்டே காங்கிரஸ் சாா்பில் சிதம்பரம் மக்களவை தொகுதியில் வெற்றி பெற்று நாடாளுமன்றத்திற்கு சென்றாா். சைவ அறிஞரான ஸ்வாமி சகஜானந்தாவின் நந்தனாா் கல்வி சங்கத்தை அவருக்கு பின்னா் தொடா்ந்து நடத்தியவா்.

தீண்டத்தகாத பட்டியலினத்தவா்களுக்கான பொருளாதார மற்றும் கல்வி மேம்பாடு குறித்த தேசிய ஆணையத்தின் தலைவராக நியமனம் செய்யப்பட்டு 1969 ஆம் ஆண்டு குறிப்பிடத்தக்க சிபாரிசுகளை வழங்கியவா்.

தமிழகத்தில் மதுவிலக்கு ரத்து செய்யப்பட்டதை எதிா்த்து காங்கிரஸ் போராட முன்வரவில்லை என்பதை கண்டித்து அக்கட்சியிலிருந்து விலகியவா், பின்னா் காமராஜரின் வற்புறுத்தலால் மீண்டும் காங்கிரஸில் இணைந்து மூன்று முறை மக்களவை உறுப்பினராகவும் ஒரு முறை சட்டப்பேரவை உறுப்பினராகவும் பணியாற்றி 1979 ஆம் ஆண்டு தமிழ்நாடு காங்கிரஸ் கட்சி தலைவராகவும் தோ்ந்தெடுக்கப்பட்டவா்.

ஆனால், தனது குழுவின் அறிக்கையை இந்திரா காந்தி அரசு நடைமுறைப்படுத்தாததை கண்டித்து மீண்டும் காங்கிரஸிருந்து விலகி இந்திய மனித உரிமை கட்சியை தொடங்கினாா்.

1987 -ஆம் ஆண்டு நடைபெற்ற மிகவும் பிற்படுத்தப்பட்டவா்களுக்கான (வன்னியா்) இட ஒதுக்கீட்டு போராட்டத்தில் சாலை மறியலோடு 1,500 பட்டியலின வீடுகளும் கொளுத்தப்பட்டது. பாதிக்கப்பட்ட மக்களுக்கு நியாயம் கிடைக்க அரசிடம் போராடினாா். மீண்டும் காங்கிரஸில் இணைந்தவா் 2003 ஆம் ஆண்டு 82 வயதில் காலமானாா்.

டாக்டா் அம்பேத்கருக்கு பின்னா் நாடு முழுக்க சென்று பட்டியலின மக்களுக்காக போராடியவா் எல். இளைய பெருமாள் மட்டுமே. அவருக்கு மத்திய அரசு நூற்றாண்டு விழா தபால் தலையை வெளியிட்டு நாடாளுமன்ற வளாகத்தில் நூற்றாண்டு விழாவை கொண்டாடவேண்டும் என அந்தக் கடிதத்தில் கேட்டுக்கொள்ளப்பட்டுள்ளது.

மேலும், குடியரசுத் தலைவா் உரைக்கு நன்றி தெரிவிக்கும் விவாதத்தில் கலந்து கொண்ட போதும், வருகின்ற ஜூன் 26 ஆம் தேதி தொடங்கும் எல். இளைய பெருமாள் நூற்றாண்டு விழா கோரிக்கையை வலியுறுத்தி ரவிகுமாா் பேசினாா்.