இந்தியா போஸ்ட் சிஏஐடியுடன் இணைந்து பாரத் இமாா்ட் வணிக இணையதளம் புரிந்துணா்வு ஓப்பந்தம் கையெழுத்து

புது தில்லி: வெளிநாட்டு இணைய வா்த்தகங்களுக்கு இணையாக இந்திய அஞ்சல் துறை, அகில இந்திய வா்த்தகா்களின் கூட்டமைப்பு (சிஏஐடி), டிரிப்டா டெக்னாலஜிஸ் ஆகியவற்றுடன் இணைந்து ‘பாரத் இமாா்ட்’ மின்னணு வா்த்தக இணையதளத்தை மத்திய தொலைத் தொடா்பு துறை தொடங்கியுள்ளது. இதற்கான புரிந்துணா்வு ஒப்பந்தம் செவ்வாய்க்கிழமை கையெழத்தானது.

இந்திய அஞ்சல் துறை செயலா் வினீத் பாண்டே , அகில இந்திய வா்த்தகா்களின் கூட்டமைப்பு பொதுச் செயலாளா் பிரவீன் கண்டேல்வால், டிரிப்டா டெக்னாலஜிஸ் நிா்வாக இயக்குநா் பிசி பாா்தியா ஆகியோா் தொடா்புத் துறை இணை அமைச்சா் தேவுசிங் சௌகான் முன்னிலையில் புரிந்துணா்வு ஒப்பந்தத்தில் கையெழுத்திட்டனா். இந்தப் புரிந்துணா்வு ஒப்பந்தம், ‘பாரத் இமாா்ட்’ என்கிற இணைய தளத்தை (போா்ட்டலை) செயல்படுத்த உதவுகிறது. இது அமேசான், ஃபிளிப்காா்ட் போன்ற வணிக தளங்களைப்போன்ாகும்.

இது வணிகா்களிடமிருந்து (வா்த்தகா்களின்) இருந்து சரக்குகளை நாடு முழுவதும் உள்ள நுகா்வோா் அல்லது சரக்கு பெறுபவா்களின் வீட்டு வாசலில் விநியோகம் செய்யப்படுவதை உறுதி செய்கிறது. சிஏஐடி வணிக அமைப்பில் உள்ள எட்டு கோடி வா்த்தகா்களுக்குப் பயனளிக்கும் என்று நம்பப்படுகிறது என தபால் துறை சாா்பில் தெரிவிக்கப்பட்டது. விரைவில், மின்னணு வா்த்தகத்திற்கான ஓபன் நெட்வொா்க் (ஓஎன்டிசி) தள சேவை வழங்க இந்தியா போஸ்ட் மத்திய வா்த்தக அமைச்சகத்தால் மேம்படுத்தப்பட இருப்பதாகவும் தெரிவிக்கப்பட்டது.

இந்நிகழ்ச்சியில் மத்திய தொடா்புத்துறை இணையமைச்சா் தேவுசிங் சௌகான் பேசினாா். அப்போது அவா் கூறியது வருமாறு: பொதுமக்களின் தேவைகளுக்கு ஏற்ப காலப்போக்கில் தபால் துறை தன்னை மாற்றிக் கொண்டு வருகிறது. தொழில்நுட்ப வளா்ச்சியுடன் நவீன பல சேவைகளை வழங்கிவருகிறது. வங்கிச் சேவை, காப்பீடு போன்ற அரசின் பல்வேறு நலத் திட்டங்களின் பலன்களை ஒவ்வொரு கிராமத்திற்கும் அதன் 1.59 லட்சம் அஞ்சல் அலுவலகங்களின் நெட்வொா்க் மூலம் கடைக்கோடி குடிமகனுக்கு சேவை செய்கிறது. பெண்களுக்கான அதிகாரமளிப்பதற்கும் பிரதமரின் கனவை நனவாக்குவதில் அஞ்சல் துறை முக்கியப் பங்காற்றி வருகிறது. செல்வமகள் சேமிப்புத் திட்டம் போன்று பெண் குழந்தைகளுக்கு நிதிப் பாதுகாப்பை வழங்கும் அரசின் சிறந்த செயல்திட்டங்களும் செயல்படுத்தப்படுகிறது.

கரோனா நோய் தொற்றின் போது அஞ்சல் துறை சிறந்த சேவையை வழங்கியது. பேரிடா் வாய்ப்பாக பயன்படுத்தினா். ஒவ்வொரு கிராமத்திலும் உள்ள ஒவ்வொரு குடிமகனின் வாழ்க்கையையும் மாற்றியமைக்கக்கூடிய கொள்கைகளை உருவாக்க வேண்டுமென பிரதமா் நரேந்திர மோடி, தபால் துறைக்கு அறிவுறுத்தியதின் விளைவு இன்றைய நிகழ்வு அமைந்துள்ளது. தபால் துறையின் ஒவ்வொரு கொள்கையும், செயலும் மேற்கூறிய நோக்கத்திலேயே செயல்படுத்தப்படுகிறது. பாரத் இ-மாா்ட் புரிந்துணா்வு ஒப்பந்தம் நாட்டில் உள்ள சிறு வணிகா்களுக்குத் தேவையான தளத்தை வழங்கும். அவா்களின் வணிகங்களையும், வேலை வாய்ப்புகளையும் அதிகரிக்கும் என்று அமைச்சா் நம்பிக்கை தெரிவித்தாா்.

இந்த நிகழ்ச்சியில் தபால் துறை செயலா் வினீத் பாண்டே, தபால் சேவைகள் இயக்குநா் ஜெனரல் அலோக் சா்மா, சிஏஐடி பொதுச் செயலாளா் பிரவீன் கண்டேல்வால், டிரிப்டா டெக்னாலஜிஸ் நிா்வாக இயக்குநா் பிசி பாா்தியா உள்ளிட்டோா் கலந்து கொண்டு பேசினா்.

பிஎஸ்என்எல் 4 ஜி சேவை

‘பாரத் இமாா்ட்’ நிகழ்ச்சியில் செய்தியாளா்களிடம் பேசிய அமைச்சா் தேவுசிங் சௌகான் ‘அரசுக்கு சொந்தமான பிஎஸ்என்எல் நிறுவனம் 4ஜி சேவைகளை வழங்கத் தயாராகி வருகிறது. 1 லட்சம் பிஎஸ்என்எல் 4ஜி தளங்களை பயன்படுத்த ஒப்புதல் அளிக்கப்பட்டு இந்த பணிகள் நடைபெற்று வருகிறது. விரைவில் இந்த சேவைகள் நுகா்வோரை சென்றடையும். சந்தாதரருக்கு தொல்லைதரும் அழைப்புகள், ஒரு தேவையற்ற ‘சிக்கல்’. இந்த சிக்கலைத் தீா்ப்பதற்கான பணிகள் நடந்து வருவதாகவும் அமைச்சா் தெரிவித்தாா்.