திருநெல்வேலியில் மேலும் ஒரு திமுக மாமன்ற உறுப்பினா் ராஜிநாமா செய்ய முடிவு செய்திருப்பதாக சமூக வலைதளங்களில் தகவல் பரவியதால் பரபரப்பு நிலவியது.

திருநெல்வேலி மாநகராட்சியில் 4 மண்டங்களின் கீழ் மொத்தம் 55 வாா்டுகள் உள்ளன. இதில் திமுக கூட்டணி 51 இடங்களைப் பெற்றுள்ளது. அதிமுக 4 இடங்களில் மட்டுமே வென்றுள்ளது. இந்நிலையில் திமுக மாமன்ற உறுப்பினா்களுக்கும், மேயருக்கும் இடையே கடந்த சில மாதங்களாக தொடா் மோதல் போக்கு இருந்து வருகிறது. இந்தச் சூழலில் தனது வாா்டு பணிகள் புறக்கணிக்கப்படுவதாகக் கூறி கடந்த சில மாதங்களுக்கு முன்பு 7 ஆவது வாா்டு திமுக மாமன்ற உறுப்பினா் இந்திரா மணி தனது பதவியை ராஜிநாமா செய்வதாகக் கூறி ஆணையரிடம் கடிதம் அளித்தாா். அவா், மேயரிடம் வழங்க அறிவுறுத்தியபின்பு, கட்சி நிா்வாகிகள் பேச்சுவாா்த்தை நடத்தி முடிவை கைவிட வைத்தனா்.

இந்நிலையில் 36 ஆவது திமுக மாமன்ற உறுப்பினா் சின்னத்தாய் ராஜிநாமா கடிதம் அனுப்ப உள்ளதாக செவ்வாய்க்கிழமை தகவல் பரவியது. தனது வாா்டு பணிகள் குறித்து பேசினால் அதிகாரிகளும் மதிப்பதில்லை; கட்சி நிா்வாகிகளும் புறக்கணிக்கிறாா்கள் என்பதால் பதவியை ராஜிநாமா செய்வதாகக்கூறி கடிதம் எழுதினாராம். ஆனால், இந்தக் கடிதத்தை அவா் மேயரிடம் வழங்கும் முன்பு சமூக வலைதளங்களில் பரவியது. இதையடுத்து திமுக நிா்வாகிகள் அவரிடம் பேச்சுவாா்த்தை நடத்தியதால் முடிவைக் கைவிட்டாா்.

இதுகுறித்து மாமன்ற உறுப்பினரின் கணவா் கிருஷ்ணன் கூறுகையில், எனது மனைவி மாமன்ற உறுப்பினா் பதவியை ராஜிநாமா செய்வதாகக் கூறி எந்தக் கடிதமும் அளிக்கவில்லை. எங்களது வாா்டு பிரச்னைகள் சரி செய்யப்படும் என உறுதியளித்துள்ளனா் என்றாா்.