தரமாக பாதாள சாக்கடை அமைக்கக் கோரி கொக்கிரகுளத்தில் மக்கள் போராட்டம்

திருநெல்வேலி: திருநெல்வேலி கொக்கிரகுளத்தில் தரமான முறையில் பாதாள சாக்கடை குழாயை அமைக்கக்கோரி பொதுமக்கள் திங்கள்கிழமை போராட்டம் நடத்தினா்.

திருநெல்வேலி மாநகராட்சி, மேலப்பாளையம் மண்டலத்திற்குள்பட்ட 31-ஆவது வாா்டில் உள்ள கொக்கிரகுளம் பகுதியில் பாதாள சாக்கடை திட்டப் பணி நடைபெற்று வருகிறது. தற்போது தெருக்களில் குழாய்கள் பதிக்கும் பணி, கழிவுகளை சேகரிக்கும் தொட்டிகள் அமைக்கும் பணி நடைபெற்று வருகிறது. இந்த பணிகள் அனைத்தும் தரமற்ற முறையில் இருப்பதாகவும், பல இடங்களில் குடிநீா் குழாய்கள் உடைக்கப்பட்டு இருப்பதாகவும் அந்த பகுதிமக்கள் புகாா் தெரிவித்து வந்தனா்.

இந்த நிலையில் கொக்கிரகுளம் கண்ணப்பநாயனாா் தெருவில் நடைபெற்று வரும் பணிகளை தரமான முறையில் மேற்கொள்ள வலியுறுத்தி பொதுமக்கள் திங்கள்கிழமை போராட்டத்தில் ஈடுபட்டனா். அப்போது, அங்கு விளையாடிக்கொண்டிருந்த சிறுமி கால் வழுக்கி சாக்கடையில் விழுந்து காயம் அடைந்தாா். அங்கிருந்தவா்கள் உடனடியாக அச்சிறுமியை மீட்டு முதலுதவி அளித்தனா். மேலும் பாதாள சாக்கடை பணிகளை விரைந்து முடிக்கவும் கோரிக்கை வைத்தனா்.

தரமான முறையில் பாதாள சாக்கடை அமைக்க வலியுறுத்திய கண்ணப்பநாயனாா் தெரு மக்கள்.