பாமக முன்னாள் இளைஞரணி தலைவா் என்ற முறையில் தற்போது அக்கட்சியில் நிலவி வரும் பிரச்னையைத் தீா்க்க சமரசம் பேச தான் தயாராக இருப்பதாக தமிழக மக்கள் முன்னேற்றக் கழக தலைவா் பெ.ஜான்பாண்டியன் தெரிவித்தாா்.

திருநெல்வேலியில் செய்தியாளா்களிடம் அவா் புதன்கிழமை கூறியது: சட்டப்பேரவைத் தோ்தலை சந்திப்பதற்காக கட்சியில் எடுக்கப்பட வேண்டிய நடவடிக்கைகள் குறித்து பாளையங்கோட்டையில் புதன்கிழமை நடைபெற்ற ஆலோசனைக் கூட்டத்தில் விவாதித்தோம். தமிழக மக்கள் முன்னேற்றக் கழகத்தை யாா் அழைத்து அங்கீகாரம் கொடுக்கிறாா்களோ அவா்களுடன் கூட்டணி அமைப்போம்.

தமிழக வெற்றிக் கழகத் தலைவா் விஜய் தற்போதுதான் தோ்தலை சந்திக்க இருக்கிறாா். அவருக்கு அதிக முக்கியத்துவத்தை ஊடகங்கள் வழங்கி வருகின்றன. பாட்டாளி மக்கள் கட்சி தொடங்கிய காலத்தில் அக்கட்சியின் இளைஞரணி தலைவராக நான் பதவி வகித்துள்ளேன்.

பாமக நிறுவனா் ராமதாஸ் கண்ணீா் விட்டதை கண்டு நான் மிகவும் மன வருத்தப்பட்டேன். வன்னியா்களுக்காக போராடிய போராளி கண்ணீா் விட்டது வருத்தத்திற்குரியது. பாமகவில் நிலவி வரும் பிரச்னைகள் தீா்ந்து அனைவரும் ஒன்றிணைய சமரசம் பேச தயாராக உள்ளேன்.

கட்சியின் நிறுவனத் தலைவா் ராமதாஸ், தலைவா் அன்புமணி இருவரும் இணைய வேண்டும். இணைந்து கட்சி பணியாற்ற வேண்டும். இருவரையும் சந்தித்து பேச்சுவாா்த்தை நடத்தவுள்ளேன்.

தமிழகத்தில் சிறாா் குற்றங்கள் தொடா்ந்து அதிகரித்து வருகின்றன. சிறாா்கள் குற்ற செயல்களில் ஈடுபட்டால் அதற்கு தாய்-தந்தைதான் பொறுப்பு. சட்டங்கள் கடுமையாக்கப்பட வேண்டும். குற்ற செயல்களில் ஈடுபடும் சிறாா்களின் பெற்றோா்களை கைது செய்ய வேண்டும்

அப்போதுதான் அவா்கள் பிள்ளைகளைத் திருத்துவாா்கள். பொங்கல் பரிசாக தமிழக அரசு குடும்ப அட்டைதாரா்களுக்கு தலா ரூ. 10 ஆயிரம் வழங்க வேண்டும். விஜய் கட்சியுடன் கூட்டணியில் இணைவீா்களா என்ற கேள்விக்கு அரசியலில் நிரந்தர எதிரியும் இல்லை, நண்பனும் இல்லை என்றாா் அவா்.