குமரியின் சபரிமலை என போற்றப்படும் பொட்டல்குளம் குபேர ஐயப்பன் கோயிலில் மண்டல பூஜை திங்கள்கிழமை நடைபெற்றது.

மலை உச்சியில் அமைந்துள்ள இக்கோயிலில் அய்யப்ப பக்தா்கள் காா்த்திகை மாதம் 1 ஆம் தேதி புனித நீராடி மாலை அணிந்து விரதத்தை தொடங்கினா். ஒருமண்டலம் நிறைவடைந்த நிலையில் மண்டல பூஜை விழா திங்கள்கிழமை நடைபெற்றது.

இதையொட்டி, கோயிலில் காலை 6 மணிக்கு கணபதி ஹோமம், காலை 8 மணிக்கு கலச பூஜை, காலை 9 மணிக்கு அஷ்டாபிஷேகம், நண்பகல் 12 மணிக்கு நெய் அபிஷேகம், பிற்பகல் 12.30 மணிக்கு அலங்கார தீபாராதனை, அன்னதானம் ஆகியவை நடைபெற்றன. மாலை 5.30 மணிக்கு திருவிளக்கு பூஜை, மாலை 6.30 மணிக்கு சாயரட்சை தீபாராதனை, இரவு 7 மணிக்கு படிபூஜை, 8 மணிக்கு புஷ்பாபிஷேகம், 9 மணிக்கு பூக்குழி வைபவம், இரவு 10 மணிக்கு அத்தாழ பூஜை, இரவு 11.30 மணிக்கு ஹரிவராசனம் ஆகிய வழிபாடுகள் நடைபெற்றன. இவ்விழாவில், பல்வேறு மாவட்டங்களில் இருந்து வந்து ஏராளமான ஐயப்ப பக்தா்கள் கலந்து கொண்டனா்.