தமிழ்நாடு அரசு அனைத்து சுகாதாரஆய்வாளா் சங்கங்களின் கூட்டமைப்பு தென்காசி மாவட்டக் கிளை சாா்பில் ஆட்சியா் அலுவலகம் முன் செவ்வாய்க்கிழமை ஆா்ப்பாட்டம் நடைபெற்றது.

இதில், மக்களைத்தேடி மருத்துவம் திட்டத்தின் கீழ் பணி நியமனம் செய்யப்படவுள்ள சுகாதார ஆய்வாளா்களுக்கு குறைந்தபட்சம் ரூ. 20ஆயிரம் ஊதிய நிா்ணயம், அதில், ஏற்கெனவே பணிபுரிந்த 1646 சுகாதார ஆய்வாளா்களுக்கு முன்னுரிமை அளித்தல், 9 ஆண்டுகளுக்கு மேலாக சுகாதார ஆய்வாளா் நிலை- 2இல் பணியாற்றுவோருக்கு பதவி உயா்வு வழங்குதல் ஆகிய கோரிக்கைகள் வலியுறுத்தப்பட்டன.

சங்கத்தின் துணைத் தலைவா் மாரியப்பன் தலைமை வகித்தாா். தமிழ்நாடு சுகாதார ஆய்வாளா்கள் சங்க மாவட்டச் செயலா் மதிவாணன், குத்தாலிங்கம், தங்கபாண்டி, ராஜேந்திரன் ஆகியோா் முன்னிலை வகித்தனா். பொது சுகாதாரத் துறை அலுவலா் சங்க மாநிலத் தலைவா் கங்காதரன், ஊரக வளா்ச்சித் துறை அலுவலா் சங்க மாவட்டச் செயலா் சுப்பிரமணியன், வேலு, கருப்பசாமி, வெங்கடேசன், கணேசன், ராஜேந்திரன் உள்ளிட்டோா் பங்கேற்றனா்.