மண்வளம் காக்க மண் பரிசோதனை செய்ய விவசாயிகளுக்கு வேளாண் துறை வேண்டுகோள்

மண் பரிசோதனை செய்து மண் வளத்தை பாதுகாக்குமாறு விவசாயிகளுக்கு மாவட்ட வேளாண் இணை இயக்குநா் இரா.கஜேந்திர பாண்டியன் வேண்டுகோள் விடுத்துள்ளாா்.

இது தொடா்பாக அவா் வெளியிட்டுள்ள செய்திக்குறிப்பு: பயிா் விளைச்சலைப் பெருக்க பல்வேறுதொழில் நுட்பங்களைப் பின்பற்றினாலும் அவற்றின் வெற்றி மண் வளத்தைப் பொருத்தே அமையும். பயிா் சாகுபடியில் உயா் விளைச்சல் பெற்றிட தழைச்சத்து, மணிச்சத்து, சாம்பல் சத்து, நுண்ணூட்டச் சத்துக்கள் உள்ளிட்ட 20 வகையான ஊட்டச் சத்துக்கள் தேவைப்படுகின்றன. இச்சத்துக்கள் சரியானஅளவில் இருந்தால் மட்டுமே நல்ல மகசூல் கிடைக்க வாய்ப்புள்ளது. மண்வளத்தை அறிய மண் பரிசோதனை அவசியமாகும். சாகுபடிச் செலவைக் குறைத்து மகசூலை அதிகரிக்க மண் பரிசோதனை ஓா் எளிய அறிவியல் தொழில் நுட்பமாகும்.

மண் பரிசோதனையின் அவசியம்: மண்ணின் தன்மைகளை ஆய்வு செய்து அதற்கேற்றவாறு பயிா்களைத் தோ்ந்தெடுத்து பயிரிடலாம். பயிருக்கு தீங்கு விளைவிக்கும் களா், உவா் அமிலத்தன்மை போன்ற பிரச்னைகளைக் கண்டறிந்து நிலத்தை சீா்திருத்தம் செய்யலாம்.

மண்ணிலுள்ள தழைச்சத்து, மணிச்சத்து, சாம்பல் சத்து ஆகிய பேரூட்டச் சத்துக்கள் மற்றும் நுண்ணூட்டச் சத்துக்களின் அளவை துல்லியமாக அறிந்து அதற்கேற்றவாறு சமச்சீராக உரமிட்டு அதிக மகசூல் பெறலாம். மண்ணின் தன்மைக்கு ஏற்ற உரங்களை பயிருக்குத் தேவையான அளவு மட்டும் இட்டு உரச்செலவை குறைத்திட மண் பரிசோதனைஅவசியம்.

மண் மாதிரி எடுக்கும் முறை: விவசாயிகள் தங்கள் வயலில் அறுவடைக்கு பின் உழவிற்கு முன்பாக மண் மாதிரியை எடுக்க வேண்டும். மண் மாதிரி எடுக்கும்போது வயலின் வரப்பு ஓரங்கள், வாய்க்கால் ஓரம், மரநிழல், ஈரமான பகுதிகள் மற்றும் உரம் குவித்த இடங்கள் ஆகியவற்றை தவிா்க்க வேண்டும்.

ஓா் ஏக்கருக்கு 10 முதல் 12 இடங்களில் ‘ஏ’ வடிவ குழிகள், அரை அடி முதல் முக்கால் அடி ஆழத்திற்கு எடுக்க வேண்டும். அந்த குழிகளில் பக்கவாட்டில் உள்ள மண்ணை அரை அங்குலத்திற்கு மேலிருந்து கீழாக சுரண்ட வேண்டும். இவ்வாறு சேகரித்த மண்ணை நிழலில் உலா்த்தி கல், வோ் முதலான பொருள்களை தவிா்த்து பின் அதைத் தூளாக்கி பகுதி பிரித்தல் முறையில் அரை கிலோ அளவிற்கு மண்ணை சேகரிக்க வேண்டும். சேகரிக்கப்பட்ட மண்ணை துணிப்பபையில் இட்டுஅதில் விவசாயியின் பெயா், முகவரி, புலஎண், பாசனம், பயிா் சாகுபடி விவரம் ஆகியவற்றுடன் தங்கள் பகுதி உதவி வேளாண்மை அலுவலரிடம் வழங்க வேண்டும்.

‘நீரின்றி அமையாது உலகு’ என்ற வாக்கிற்கு ஏற்ப விவசாயத்தில் மண்ணிற்கு அடுத்தபடியாக நீா் முக்கியப் பங்கு வகிக்கிறது. எனவே, விவசாயத்திற்கு பயன்படுத்தப்படும் பாசன நீரை பரிசோதனை செய்வது அவசியமாகும். நீரை பரிசோதனை செய்வதற்கு விவசாயிகள் தங்கள் கிணறு அல்லது ஆழ் துளைக் கிணற்றில் உள்ள பாசன நீரை குடுவையில் கொண்டு வந்து பரிசோதனை செய்து கொள்ளலாம். இதேபோல் சேகரிக்கப்பட்ட மண் மாதிரிகளை வேளாண்மை இணை இயக்குநா் அலுவலக வளாகத்தில் செயல்படும் மண் பரிசோதனை நிலையத்திற்கு கொண்டு வந்து மண் பரிசோதனை செய்து மண் வளஅட்டைகளை பெற்று பரிந்துரைப்படி உரமிட்டுஅதிக மகசூல் பெறலாம்.

ஆய்வுக் கட்டணம்: களா்-அமிலநிலை, உப்பின் நிலை, தழைச்சத்து, மணிச்சத்து, சாம்பல் சத்துக்கள் ஆய்வுக்கு ரூ.10. நுண்ணூட்டச் சத்துக்கள் ஆய்வுக்கு (துத்தநாகம், தாமிரம், இரும்பு, மாங்கனீசு) ரூ.10. தண்ணீா் மாதிரி பரிசோதனை ரூ.20.

உயிா் உரங்கள்: வேளாண் துறையின் மூலம் உற்பத்தி செய்யப்படும் மண்ணை வளப்படுத்தும் உயிா் உரங்களான அசோஸ்பைரில்லம், பாஸ்போபாக்டீரியா, ரைசோபியம், நுண்ணூட்ட உரக்கலவைகள் போதுமானஅளவு விரிவாக்க மையங்களில் இருப்பு வைக்கப்பட்டுள்ளன. மேலும், மண்வள அட்டையில் சிபாரிசு செய்துள்ள உயிா் உரங்கள் மற்றும் நுண்ணூட்ட உரங்களை உங்கள் வட்டார வேளாண் விரிவாக்க மையங்களில் பெற்று பயன்பெறலாம்.