திருநெல்வேலி மாவட்ட கடற்கரையில் மீன்பிடி துறைமுகம் அமைப்பது தொடா்பாக பரிசீலனை செய்யப்படும் என்றாா்ஆட்சியா் வே.விஷ்ணு.

ராதாபுரத்தில் வியாழக்கிழமை நடைபெற்ற மீனவா்கள் குறைதீா்க்கும் நாள் கூட்டத்துக்கு ஆட்சியா் தலைமை வகித்து மீனவா்களின் கோரிக்கைகளை கேட்டறிந்தாா்.

இடிந்தகரை, உவரி, கூத்தங்குழி, கூட்டப்புளி, பெருமணல் உள்ளிட்ட மீனவ கிராமங்களைச் சோ்ந்த ஊராட்சித் தலைவா்கள், மீனவப் பிரதிநிதிகள் பங்கேற்று பல்வேறு புகாா்களை தெரிவித்தனா். குறிப்பாக, மீனவக் கிராமங்களுக்கு தாமிரவருணி கூட்டுக்குடிநீா் வரவில்லை, பெருமணல் உள்ளிட்ட அனைத்து மீனவக் கிராமங்களிலும் தூண்டில் பாலம் அமைக்கவேண்டும், உவரியில் ரூ.63 கோடியில் அமைக்கப்பட்ட தூண்டில் பாலத்தை சீா்படுத்த வேண்டும், மீனவா்களுக்கு வழங்கப்பட்ட இலவச வீட்டுமனைப்பட்டா நிலங்களை அடையாளப்படுத்த வேண்டும், பஞ்சல் கடற்கரைப் பகுதியை சுற்றுலாத்தலமாக அறிவித்து அடிப்படை வசதிகள் செய்துதர வேண்டும் என்பன உள்ளிட்ட கோரிக்கைகள் முன்வைக்கப்பட்டன.

அதற்குப் பதலளித்து ஆட்சியா் பேசியது:

மீனவக் கிராமங்களில் தூண்டில் பாலம் அமைப்பது தொடா்பாக அரசின் கவனத்திற்கு கொண்டு செல்லப்பட்டு நடவடிக்கைகள் மேற்கொள்ளப்பட்டுள்ளன. மீன்பிடி துறைமுகம் அமைப்பது தொடா்பாக மீனவா்களிடம் கருத்துகள் கேட்கப்பட்டு, இந்தக் கடற்கரைப் பகுதியை ஆய்வு செய்து நடவடிக்கை எடுக்கப்படும். கடற்கரை கிராம இளைஞா்களுக்காக விளையாட்டு அகாதெமி, வேலைவாய்ப்புப் பயிற்சி தொடங்கப்படும். பெண்களுக்கு சுயதொழில் பயிற்சி அளிக்கப்படும். மீனவா்கள் அளித்துள்ள மனுக்கள் மீது துறை வாரியாக நடவடிக்கை எடுக்கப்படும். மீனவக் கிராமங்களில் கடவுசீட்டு முகாம் விரைவில் நடத்தப்படும் என்றாா் அவா். பின்னா், மாற்றுத்திறனாளிகள் உள்ளிட்ட 11 பேருக்கு நலத் திட்ட உதவிகளை ஆட்சியா் வழங்கினாா்.

கூட்டத்தில், சேரன்மகாதேவி கோட்டாட்சியா் சிந்து, தூத்துக்குடி மீன்வளத் துறை இணை இயக்குநா் அமுல் சேவியா், ராதாபுரம் மீன்வளத் துறை உதவி இயக்குநா் மோகன்குமாா், வட்டாட்சியா்கள் ராதாபுரம் சேசுராஜ், திசையன்விளை செல்வகுமாா், மீனவப் பிரதிநிதிகள் உவரி ரைமண்ட், முன்னாள் ஊராட்சித் தலைவா் அந்தோணி, தி.மு.க. மீனவா் அணி மாவட்டச் செயலா் எரிக்ஜூடு, கூத்தங்குழி சூசைஅந்தோணி, கவுன்சிலா் ராஜா, ஊராட்சித் தலைவா் வளா்மதி, கூடுதாழை அருணா டென்சிங், இடிந்தகரை ஊராட்சித் தலைவா் சகாயராஜ், கூட்டப்பனை வினிஸ்டன், அந்தோணி சேவியா் உள்ளிட்டோா் கலந்துகொண்டனா்.

Image Caption

~