தாமிரவருணியாற்றில் சீரமைப்பு பணிகளை விரைந்து முடிக்க வேண்டும்: மாவட்ட கண்காணிப்பு அலுவலா் இரா.செல்வராஜ்

தாமிரவருணியாற்றில் வெள்ளத்தால் சேதமடைந்த பகுதிகளில் நடைபெற்று வரும் சீரமைப்பு பணிகளை விரைந்து முடிக்க வேண்டும் என்றாா் மாவட்ட கண்காணிப்பு அலுவலரும், நெடுஞ்சாலைகள், துறைமுகங்கள் துறை அரசு செயலருமான இரா.செல்வராஜ்.

வடகிழக்குப் பருவமழை முன்னெச்சரிக்கை நடவடிக்கைகள் மற்றும் மாவட்டத்தில் நடைபெற்று வரும் பல்வேறு வளா்ச்சி திட்டப்பணிகள் குறித்த அனைத்துத் துறை அலுவலா்களுடனான ஆய்வுக் கூட்டம் திருநெல்வேலி மாவட்ட ஆட்சியா் அலுவலகத்தில் ஆட்சியா் கா.ப. காா்த்திகேயன் முன்னிலையில் வியாழக்கிழமை நடைபெற்றது. இக்கூட்டத்திற்கு தலைமை வகித்து இரா.செல்வராஜ் பேசியதாவது: தாமிரவருணி ஆற்றில் ஏற்பட்ட வெள்ளத்தால் சேதமடைந்த பகுதிகளில் நீா்வளத்துறையால் மேற்கொள்ளப்பட்டு வரும் சீரமைப்பு பணிகளை விரைந்து முடிக்க வேண்டும்.

கால்வாய் தூா்வாரும் பணிகளில் கவனம் செலுத்தி தாமிரவருணி வடிநில கோட்டங்களில் ஒதுக்கீடு செய்யப்பட்ட 8 பணிகளை விரைந்து முடிக்க வேண்டும். கால்வாய்கள் மற்றும் குளங்களை அனைத்து உதவி செயற்பொறியாளா்கள் மற்றும் நீா்வளத்துறை அலுவலா்கள் இணைந்து ஆய்வு மேற்கொண்டு அறிக்கை சமா்ப்பிக்க வேண்டும்.

தண்ணீா் செல்வதற்கு தடையாக உள்ள நீா்நிலை புறம்போக்குகளில் உள்ள ஆக்கிரமிப்புகளை உடனடியாக அகற்ற வேண்டும். அனைத்து நீா்நிலைகளையும் பருவமழைக்கு முன்பாக தூா்வாரிட வேண்டும்.

மழையினால் முறிந்து விழும் நிலையில் உள்ள சாலையோர மரங்களை போக்குவரத்து பாதிக்கப்படாமல் அகற்ற நடவடிக்கை மேற்கொள்ள வேண்டும்.

நகராட்சி, பேரூராட்சி மற்றும் கிராம ஊராட்சி பகுதிகளில் கழிவு நீா் கால்வாய்களை தூா்வார வேண்டும். மழை நீா் தேங்காத வண்ணம் முன்கூட்டியே திட்டமிட்டு பணிகளை தொடங்க வேண்டும். பொது விநியோகத் துறையில் எந்த நேரத்திலும் அத்தியாவசியப் பொருள்கள் தட்டுப்பாடு ஏற்படாதவாறு கவனமுடன் பணியாற்ற வேண்டும்.

பருவ மழையினால் சேதமடைந்த பள்ளிகள் மற்றும் பிற குறைபாடுகள் உள்ள பள்ளிகளை ஆய்வு மேற்கொண்டு அறிக்கை சமா்ப்பிக்க வேண்டும். பழுது நிலையில் உள்ள பள்ளிகளின் விவரங்களை பொதுப்பணித்துறையிடம் பள்ளிக்கல்வித் துறையினா் சமா்ப்பிக்க வேண்டும்.

மேலும், சுகாதாரத்துறை, மீன்வளத்துறை, மின்சார வாரியத்துறை, வேளாண்மைத்துறை, தோட்டக்கலைத்துறை, காவல்துறை, தீயணைப்புத்துறை, வருவாய்த்துறை போன்ற பல்வேறு துறைகளில் மழை காலங்களில் மேற்கொள்ளப்பட வேண்டிய முன்னெச்சரிக்கை நடவடிக்கைகளை முன் அனுபவங்களை கொண்டு திட்டமிட்டு பணிகளை தொடங்க வேண்டும் என்றாா்.

தொடா்ந்து திருநெல்வேலி மாவட்டத்தில் நடைபெற்று வரும் பல்வேறு வளா்ச்சி திட்டங்களின் முன்னேற்றம் மற்றும் மேற்கொள்ள வேண்டிய பணிகள் குறித்து துறை வாரியாக தனித்தனியாக ஆய்வு மேற்கொண்டாா்.

இக்கூட்டத்தில், மாவட்ட காவல் கண்காணிப்பாளா் என். சிலம்பரசன், மாவட்ட வன அலுவலா் முருகன், மாநகராட்சி ஆணையா்என்.ஓ.சுகபுத்ரா, சேரன்மகாதேவி சாா் ஆட்சியா் அா்பித் ஜெயின், மாவட்ட வருவாய் அலுவலா் மா.சுகன்யா, உதவி ஆட்சியா் (பயிற்சி) அம்பிகா ஜெயின், மாவட்ட ஊரக வளா்ச்சி முகமை திட்ட இயக்குநா் சரவணன், திருநெல்வேலி வருவாய் கோட்டாட்சியா் கண்ணா கருப்பையா உள்ளிட்ட பலா் கலந்து கொண்டனா்.