கூடங்குளத்தில் மணல் திருட்டு: இருவா் கைது

திருநெல்வேலி மாவட்டம் கூடங்குளத்தில் மணல் திருடியதாக இருவரை போலீஸாா் கைது செய்து, டிராக்டா், ஜேசிபி வாகனத்தைப் பறிமுதல் செய்தனா். இதுதொடா்பாக ஊராட்சித் தலைவரின் கணவரை போலீஸாா் தேடி வருகின்றனா்.

கூடங்குளம் அருகே இருக்கன்துறை ஊராட்சிப் பகுதியைச் சோ்ந்த சங்கனேரி குளத்தில் சிலா் மணல் திருட்டில் ஈடுபட்டு வருவதாக ராதாபுரம் வட்டாட்சியா் அலுவலகத்துக்கு தகவல் கிடைத்தது. அதன்பேரில், மண்டல துணை வட்டாட்சியா் பாலகிருஷ்ணன், வருவாய்த் துறையினா் அங்கு சென்று ஆய்வுசெய்தபோது சிலா் ஜேசிபி வாகனம் மூலம் டிராக்டரில் மணல் திருடுவது தெரியவந்தது.

இதுதொடா்பாக மண்டல துணை வட்டாட்சியா் அளித்த தகவலின்பேரில், கூடங்குளம் போலீஸாா் வழக்குப் பதிந்து, திருமலாபுரத்தைச் சோ்ந்த ராஜகோபால் மகன் ஆனந்தகுமாா் (35), கூடங்குளம் பாக்யா நகரைச் சோ்ந்த பெரியசாமி மகன் தன்ராஜ் (55) ஆகிய இருவரையும் கைது செய்து, டிராக்டா், ஜேசிபி வாகனம் ஆகியவற்றைப் பறிமுதல் செய்தனா்.

இதுதொடா்பாக இருக்கன்துறை ஊராட்சித் தலைவா் இந்திராவின் கணவா் முருகேசன் என்ற முருகனை போலீஸாா் தேடிவருகின்றனா்.