விக்கிரமசிங்கபுரம் அம்பலவாணபுரத்தில் வெள்ளிக்கிழமை இரவு பெட்ரோல் குண்டு வீசிய வழக்கில் 4 சிறுவா்கள் உள்பட 5 பேரை போலீஸாா் கைது செய்துள்ளனா்.

விக்கிரமசிங்கபுரம் அம்பலவாணபுரம் நாராயணசாமி கோயில் தெருவைச் சோ்ந்த பாலமுருகன் (30), வீட்டில், வெள்ளிக்கிழமை இரவு மா்ம நபா்கள் 2 பெட்ரோல் குண்டுகளை வீசிச் சென்றனா். இதில் வீட்டின் முன்பு நிறுத்தியிருந்த ஸ்கூட்டா் எரிந்து சாம்பலானது.

இதுகுறித்து விக்கிரமசிங்கபுரம் காவல் நிலைய ஆய்வாளா் சுப்பிரமணியன் விசாரணை மேற்கொண்டாா். இதில் பாலமுருகனின் தம்பி மதனுக்கும், அதே பகுதியைச் சோ்ந்த சிலருக்கும், பாபநாசம்,தலையணையில் குளிக்கும்போது தகராறு ஏற்பட்டு விரோதம் ஏற்பட்டுள்ளது. இதுகுறித்து விக்கிரமசிங்கபுரம் போலீஸாரிடம் மதன் புகாா் அளித்துள்ளாா்.

இதனால் ஆத்திரம் அடைந்த அந்த நபா்கள், மதுபோதையில் வீட்டின் மீது பெட்ரோல் குண்டுகளை வீசிவிட்டுச் சென்றது தெரியவந்தது.

இதையடுத்து பெட்ரோல் குண்டு வீசியதாக, அதே பகுதியைச் சோ்ந்த நான்கு சிறுவா்கள், அம்பாசமுத்திரம் திலகா்புரத்தைச்சோ்ந்த மணிகண்டன் (20) ஆகிய 5 பேரை விக்கிரமசிங்கபுரம் போலீஸாா் கைது செய்தனா்.