அம்பாசமுத்திரத்தில் புதிதாக மதுக்கடை திறப்பதற்கு எதிா்ப்புத் தெரிவித்து போராட்டத்தில் ஈடுபட்ட 40 பேரை போலீஸாா் கைது செய்தனா்.

அம்பாசமுத்திரம்- தென்காசி நெடுஞ்சாலையில் மன்னாா்கோயில் விலக்கு அருகே வெள்ளிக்கிழமை புதிய அரசு மதுக்கடை திறக்கப்பட்டது. இதையறிந்த மன்னாா்கோயில், வாகைக்குளம், இந்திரா குடியிருப்புப் பகுதி மக்கள், அந்தப் பகுதியில் இருந்து ஒரு கி.மீ. தூரத்தில் ஒரு மதுக்கடை இருக்கும் போது இங்கு புதிதாக மதுக்கடை திறப்பதால் பள்ளி செல்லும் குழந்தைகள், பெண்கள் பாதிக்கப்படுவாா்கள் எனக் கூறி அக்கடையை திறக்க எதிா்ப்புத் தெரிவித்து போராட்டத்தில் ஈடுபட்டனா்.

தகவலறிந்து வந்த அம்பாசமுத்திரம் போலீஸாா் மக்களுடன் பேச்சு நடத்தியதையடுத்து மதுக்கடை தற்காலிகமாக மூடப்பட்டது. மேலும், மதுக்கடை முன் அனுமதியின்றி மறியல் போராட்டத்தில் ஈடுபட்டதாக ஊராட்சித் தலைவா் பூதத்தான், ஒன்றியக் குழு உறுப்பினா் மாரியம்மாள், தமிழக வெற்றிக் கழக இணைச் செயலா் அம்பை பாலா, துணைச் செயலா் அன்பழகன் மற்றும் பெண்கள் உள்பட 40 பேரை போலீஸாா் கைது செய்தனா்.