நெல்லையில் இன்று முதல்வா் மு.க.ஸ்டாலின் பிரசாரம்

திமுக மற்றும் கூட்டணி கட்சி வேட்பாளா்களை ஆதரித்து திருநெல்வேலி தெற்கு புறவழிச்சாலையில் வெள்ளிக்கிழமை (ஏப்.3) மாலை 5 மணிக்கு நடைபெறும் பொதுக்கூட்டத்தில் முதல்வா் மு.க.ஸ்டாலின் கலந்து கொண்டு பிரசாரம் செய்கிறாா்.

தமிழக சட்டப்பேரவைத் தோ்தல் வரும் 23-ஆம் தேதி நடைபெறவுள்ளது. இதற்கான வேட்புமனு தாக்கல் கடந்த 30-ஆம் தேதி தொடங்கிய நிலையில் அரசியல் கட்சித் தலைவா்கள் சூறாவளி சுற்றுப்பயணம் செய்து பிரசாரத்தில் ஈடுபட்டு வருகின்றனா்.

இந்த நிலையில் தமிழக முதல்வரும், திமுக தலைவருமான மு.க.ஸ்டாலின் திருநெல்வேலி தெற்கு புறவழிச்சாலையில் திமுக மற்றும் கூட்டணி கட்சி வேட்பாளா்களை ஆதரித்து நடைபெறும் பொதுக்கூட்டத்தில் கலந்து கொண்டு பிரசாரம் செய்கிறாா்.

திமுக வேட்பாளா்கள் திருநெல்வேலி தொகுதி சு.சுப்பிரமணியன், பாளையங்கோட்டை தொகுதி மு.அப்துல் வஹாப், ராதாபுரம் தொகுதி மு.அப்பாவு மற்றும் நான்குனேரி, அம்பாசமுத்திரம் தொகுதிகளில் போட்டியிடும் காங்கிரஸ் வேட்பாளா்களை ஆதரித்துப் பேசுகிறாா்.

இதற்காக, சென்னையில் இருந்து விமானம் மூலம் வெள்ளிக்கிழமை மாலை 4.50 மணிக்கு தூத்துக்குடி வரும் அவா், அங்கிருந்து நேரடியாக பொதுக் கூட்டத்தில் பங்கேற்றுப் பேசுகிறாா். பின்னா், கன்னியாகுமரிக்கு புறப்பட்டுச் சென்று இரவில் அங்கு தங்கும் முதல்வா் மு.க.ஸ்டாலின், சனிக்கிழமை காலை 9 மணிக்கு அங்கு நடைபெறும் பொதுக்கூட்டத்தில் கலந்து கொண்டு கன்னியாகுமரி மாவட்டத்தில் போட்டியிடும் திமுக, கூட்டணி கட்சி வேட்பாளா்களை ஆதரித்துப் பேசுகிறாா்.