நிலக்கரி மாயமான விவகாரத்தில்தவறு செய்தவா்கள் மீது கடும் நடவடிக்கை :அமைச்சா் வி. செந்தில் பாலாஜி

தமிழகத்தில் அனல்மின் நிலையங்களில் நிலக்கரி மாயமான விவகாரத்தில் தொடா்புடையவா்கள் மீது கடும் நடவடிக்கை எடுக்கப்படும் என்றாா் தமிழக மின் துறை அமைச்சா் வி. செந்தில் பாலாஜி.

தூத்துக்குடியில் வெள்ளிக்கிழமை அவா் அளித்த பேட்டி:

கடந்த ஆட்சியில், தூத்துக்குடி அனல் மின்நிலையத்தில் பதிவேட்டுக்கும், இருப்புக்கும் இடையே ஏறத்தாழ 71 ஆயிரம் டன் நிலக்கரி குறைபாடு ஏற்பட்டுள்ளது. இதுகுறித்து விரிவான விசாரணை நடத்தி அறிக்கை தாக்கல் செய்ய குழு அமைக்கப்பட்டுள்ளது. அந்தக் குழுவின் இறுதி அறிக்கை பெறப்பட்ட பிறகு, முதல்வா் கவனத்துக்கு எடுத்துச் சென்று மேல்நடவடிக்கை எடுக்கப்படும்.

தமிழகத்தில் உள்ள அனல்மின் நிலையங்களில் நிலக்கரி இருப்புக்கும், பதிவேட்டுக்கும் இடையே உள்ள வித்தியாசத்தில் யாா் தவறு செய்திருந்தாலும் அரசு உரிய நடவடிக்கை எடுக்கும்.

தூத்துக்குடி அனல்மின் நிலையத்தில் நாளொன்றுக்கு 16 ஆயிரம் டன் நிலக்கரி தேவை. 4 நாள்கள் வரை தேவையான நிலக்கரி இருப்பு வைக்கப்படுகிறது. தமிழகத்தின் ஒட்டுமொத்த நிலக்கரி தேவை நாள் ஒன்றுக்கு 56 ஆயிரம் டன் ஆகும். ஒவ்வொரு நாள் தேவைக்கு ஏற்ப நிலக்கரி தொடா்ந்து வந்து கொண்டிருக்கிறது.

அனல்மின் நிலையங்களில் உற்பத்தியை அதிகரிக்க நடவடிக்கை எடுக்கப்பட்டுள்ளது. இதனால் தமிழகத்தில் 43 சதவீதத்தில் இருந்து 70 சதவீதமாக உற்பத்தி அதிகரிக்கப்பட்டுள்ளது.

தமிழகத்தில் 4 லட்சத்து 52 ஆயிரம் விவசாயிகள் மின் இணைப்புக்காக பதிவு செய்து காத்திருக்கிறாா்கள். அதன்பேரில், நிகழாண்டு ஒரு லட்சம் விவசாயிகளுக்கு மின் இணைப்பு வழங்கப்பட உள்ளது.

தமிழகத்தில் 4 ஆயிரம் மெகாவாட் சூரிய ஒளி மின்சாரம் உற்பத்தி செய்ய நடவடிக்கை எடுக்கப்பட்டு வருகிறது. 2 ஆயிரம் மெகாவாட் எரிவாயு மூலம் புதிய மின் திட்டங்களை தொடங்குவதற்கான பணிகளும் மேற்கொள்ளப்பட்டுள்ளன.

6,200 மெகாவாட் மின்உற்பத்தி திட்டங்கள் 2006-2011 இல் அறிவிக்கப்பட்டு கடந்த 10 ஆண்டுகளாக நிலுவையில் உள்ளன. அந்தத் திட்டங்கள் குறித்து மறு ஆய்வு செய்து, அந்தத் திட்டங்களை தொடங்கி பயன்பாட்டுக்கு கொண்டு வருவதற்கான நடவடிக்கைகள் எடுக்கப்பட்டு வருகின்றன.

மின்சாரத்துறையில் ஒரு லட்சத்து 46 ஆயிரம் பணியிடங்கள் உள்ளன. இதில் 56 ஆயிரம் பணியிடங்கள் காலியாக உள்ளன. அந்தக் காலிப்பணியிடங்கள் நிதிநிலைக்கு ஏற்ப, அவசர தேவைகளை கருத்தில் கொண்டு நிரப்ப நடவடிக்கை எடுக்கப்படும்.

தமிழகத்தில் உள்ள 3.63 லட்சம் மின்மாற்றிகளில் நவீன கருவி பொருத்தும் பணி மேற்கொள்ளப்பட உள்ளது.

மாதந்தோறும் மின்சார கணக்கெடுப்பு செய்யும் போது பணியாளா்கள் தேவை இரட்டிப்பாகும். தற்போது ஸ்மாா்ட் மீட்டா் பொருத்த உள்ளோம். அதை கருத்தில் கொண்டு ஆராய்ந்து அடுத்தகட்ட நடவடிக்கை எடுக்கப்படும் என்றாா் அவா்.

முன்னதாக, தூத்துக்குடி அனல்மின் நிலையத்தில் ஆய்வு மேற்கொண்ட அமைச்சா் வி. செந்தில் பாலாஜி, அனல்மின் நிலையத்தின் நிலக்கரி சேமிப்பு கிடங்கு, மின் உற்பத்தி பகுதி, கட்டுப்பாட்டு அறை உள்ளிட்ட பகுதிகளை பாா்வையிட்டு அதிகாரிகளுடன் ஆலோசனை நடத்தினாா்.

ஆய்வின் போது, தமிழக சமூக நலன் மற்றும் மகளிா் உரிமைத் துறை அமைச்சா் பெ. கீதாஜீவன், தமிழ்நாடு மின்சார வாரிய தலைவா் மற்றும் மேலாண்மை இயக்குநா் ராஜேஷ் லக்கானி, தூத்துக்குடி அனல்மின் நிலைய தலைமை பொறியாளா் கிருஷ்ணகுமாா் உள்ளிட்டோா் உடனிருந்தனா்.