ஹாக்கி யூனிட் ஆஃப் தமிழ்நாடு சாா்பில், தூத்துக்குடி மாவட்டம், கோவில்பட்டி கிருஷ்ணா நகரிலுள்ள செயற்கையிழை நடைபெற்று வரும் 12ஆவது ஹாக்கி இந்தியா தேசிய ஜூனியா் ஆடவா் ஹாக்கி போட்டியின் இறுதி ஆட்டத்துக்கு உத்தர பிரதேசம், சண்டீகா் அணிகள் தகுதி பெற்றன.

கடந்த 17ஆம் தேதி முதல் லீக், நாக் அவுட் முறையில் நடைபெற்று வரும் இப்போட்டியில் 29 அணிகள் பங்கேற்றன.

வெள்ளிக்கிழமை நடைபெற்ற அரையிறுதி போட்டியில் உத்தர பிரதேசம் அணி, ஹரியாணா அணியை 2 - 1 என்ற கோல் கணக்கிலும், 2ஆவது ஆட்டம் 2-2 என சமநிலையை எட்டியதால் சூட் அவுட் முறையில் சண்டீகா் அணி, ஒடிஸா அணியை 5 - 3 என்ற கோல் கணக்கிலும் வீழ்த்தி இறுதிப் போட்டிக்கு முன்னேறின.

இறுதிப்போட்டி ஞாயிற்றுக்கிழமை (மே 29) மாலை 7.30 மணிக்கு நடைபெறும். தொடா்ந்து, 3, 4ஆவது இடத்துக்கான போட்டியில் ஹரியாணா - ஒடிஸா அணிகள் மோதுகின்றன.