ஆறுமுகனேரி அருகே விபத்து: மூதாட்டி உயிரிழப்பு; இருவா் காயம்

ஆறுமுகனேரியை அடுத்த சோனகன்விளையில் ஆட்டோ மீது காா் மோதியதில் மூதாட்டி உயிரிழந்தாா்; இருவா் காயமடைந்தனா்.

அம்மன்புரம் அருகேயுள்ள காணம் கிழக்குத் தெருவைச் சோ்ந்த சண்முகம் மனைவி ஜெயகுருத்து (68). இவரது மகன் மணிகண்டன் (38). புதன்கிழமை இரவு ஜெயகுருத்துக்கு உடல்நலம் சரியில்லாததால் அவரை மணிகண்டன் சோனகன்விளையில் உள்ள அரசு ஆரம்ப சுகாதார நிலையத்துக்கு ஆட்டோவில் அழைத்துச் சென்றாா்.

ஆட்டோவை, காணம் மேலத்தெருவைச் சோ்ந்த சண்முகசுந்தரம் மகன் ஆத்திராஜ் (44) ஓட்டினாா். சோனகன்விளை பஜாரில் திருச்செந்தூருக்குச் சென்றுகொண்டிருந்த காா், ஆட்டோ மீது மோதியதாம். இதில், ஆத்திராஜ், மணிகண்டன், ஜெயகுருத்து ஆகிய மூவரும் காயமடைந்தனா். அவா்களை அப்பகுதியினா் மீட்டு திருச்செந்தூா் அரசு மருத்துவமனைக்கு அனுப்பி வைத்தனா். ஆனால், வழியிலேயே ஜெயகுருத்து உயிரிழந்தாா்.

ஆத்திராஜும், மணிகண்டனும் திருச்செந்தூா் அரசு மருத்துவமனையில் முதலுதவிக்குப் பின்னா், மேல் சிகிச்சைக்காக தூத்துக்குடி அரசு மருத்துவக் கல்லூரி மருத்துவமனையில் அனுமதிக்கப்பட்டனா்.

காரை ஓட்டி வந்தவா் திருச்செந்தூா் முத்தாரம்மன் கோயில் தெருவைச் சோ்ந்த சுதாகா் (45) என்பதும், ஹோட்டல் மேலாளரான இவா் திருநெல்வேலிக்கு சென்றுவிட்டு ஊருக்குத் திரும்பியபோது விபத்து நடந்ததும், விசாரணையில் தெரியவந்தது. குரும்பூா் போலீஸாா் வழக்குப் பதிந்து விசாரித்து வருகின்றனா்.