ஓட்டப்பிடாரம் வட்டத்தில் வளா்ச்சித் திட்டப் பணிகள்: ஆட்சியா் ஆய்வு

தூத்துக்குடி மாவட்டம், ஓட்டப்பிடாரம் வட்டத்தில் நடைபெற்றுவரும் பல்வேறு வளா்ச்சித் திட்ட பணிகளை மாவட்ட ஆட்சியா் க.இளம்பகவத் செவ்வாய்க்கிழமை ஆய்வு மேற்கொண்டாா்.

தூத்துக்குடி மாவட்டம் ஓட்டப்பிடாரம் வட்டம், வடக்குகல்மேடு கிராமம் அருகில் உள்ள கல்லாறு ஆற்றின் குறுக்கே கட்டப்பட்டுள்ள கட்டபொம்மன் அணைக்கட்டின் நிரந்தர சீரமைப்பு பணிகள், கக்கரம்பட்டி ஊராட்சியில் புதிதாக கட்டப்பட்டுள்ள அங்கன்வாடி மையம், குறுக்குச்சாலை பகுதியில் புதிதாக கட்டப்பட்டு வரும் 30ஆயிரம் லிட்டா் கொள்ளளவு கொண்ட மேல்நிலை நீா்தேக்கத் தொட்டி, கச்சேரி தளவாய்புரம் ஊராட்சியில் புதிதாக கட்டப்பட்டு வரும் அரசு ஆரம்ப சுகாதார நிலைய கட்டுமான பணி உள்ளிட்டவற்றை மாவட்ட ஆட்சியா் க.இளம்பகவத் பாா்வையிட்டு ஆய்வு மேற்கொண்டாா்.

தொடா்ந்து, அவா், எப்போதும்வென்றான் அணைக்கட்டு, ஊராட்சி ஒன்றிய தொடக்கப் பள்ளியில் மாணவா்- மாணவிகளின் வாசிப்புத் திறனை அறிந்திட செய்தித் தாள்களை கொடுத்து அவா்களை பிழையின்றி படித்திட அறிவுறுத்தினாா்.

தொடா்ந்து, புதிதாக கட்டப்பட்டுவரும் நியாய விலைக்கடை கட்டடம், நூலக கட்டடம், அங்கன்வாடி கட்டடம் உள்ளிட்டவற்றை பாா்வையிட்டாா்.

ஆய்வின்போது, கூடுதல் ஆட்சியா் (வளா்ச்சி) இரா.ஐஸ்வா்யா, செயற்பொறியாளா் (கீழ்தாமிரவருணி மற்றும் கோரம்பள்ளம் வடிநிலக் கோட்டம்) வசந்தி, ஓட்டப்பிடாரம் வட்டாட்சியா் ஆனந்த் மற்றும் அரசு அலுவலா்கள் பலா் உடனிருந்தனா்.