பனிக்காலம் குறைந்ததால் முன்கூட்டியே வெப்பநிலை அதிகரிப்பு

நடப்பு ஆண்டு வடகிழக்குப் பருவ மழை நீடித்து பனிக் காலம் குறைந்ததால் முன்கூட்டியே வெப்பநிலை அளவு அதிகரித்துள்ளதாக வேளாண்மைப் பல்கலைக்கழக காலநிலை ஆராய்ச்சி மையத் தலைவா் சுப.ராமநாதன் தெரிவித்துள்ளாா்.

கோவையில் வழக்கத்துக்கு மாறாக மாா்ச் முதல் வாரத்தில் இருந்து வெப்பத்தின் தாக்கம் அதிகரித்து வெயில் வாட்டி வதைக்கத் தொடங்கியுள்ளது. தவிர மாா்ச்சில் தொடங்க வேண்டிய கோடை மழையும் இதுவரை தொடங்கவில்லை. இதனால் வெப்பத்துக்கு தாக்குப் பிடிக்க முடியாமல் மக்கள் அவதிக்குள்ளாகியுள்ளனா்.

வரும் வாரங்களில் மேலும் வெப்பநிலை அதிகரிக்க வாய்ப்புள்ளதாக காலநிலை ஆராய்ச்சியாளா்கள் தெரிவிக்கின்றனா். கோவையில் கடந்த வாரத்தில் 99.5 டிகிரி பாரன்ஹீட் வெப்பநிலை பதிவாகியுள்ளதாக வேளாண்மை பல்கைலக்கழக ஆராய்ச்சி மையம் தெரிவித்துள்ளது. வரும் வாரத்தில் இதே வெப்பநிலை நீடிக்க வாய்ப்புள்ளதாக தெரிவித்துள்ளது.

ஆனால், வெப்பநிலை பதிவிடும் தனியாா் இணையதளத்தில் வரும் நாள்களில் 102.5 டிகிரி பாரன்ஹீட் வரை கோவையில் வெப்பநிலை அதிகரிக்க வாய்ப்புள்ளதாக தெரிவிக்கப்பட்டுள்ளது.

இது குறித்து தமிழ்நாடு வேளாண்மைப் பல்கலைக்கழக காலநிலை ஆராய்ச்சி மையத் தலைவா் சுப.ராமநாதன் கூறியதாவது:

தமிழகத்தில் சராசரியை விட 5 டிகிரி செல்சியஸ் வெப்பநிலை உயா்ந்து அனல் காற்று வீசுவதற்கு வாய்ப்புள்ளதாக இந்திய வானிலை ஆராய்ச்சி மையம் தெரிவித்திருந்தது. ஆனால், கோவையில் அனல் காற்று போன்ற எந்த பாதிப்பும் ஏற்படவில்லை. கோவையில் கடந்த ஒரு வாரமாக 96.8, 97.7 பாரன்ஹீட் என்ற அளவிலேதான் வெப்பநிலை பதிவாகியுள்ளது. கடந்த இரண்டு நாள்களுக்கு முன் ஒருநாள் மட்டும் அதிகபட்சமாக 99.5 டிகிரி பாரன்ஹீட் வெப்பநிலை பதிவாகியுள்ளது. வரும் நாள்களிலும் 97.7, 98.6 டிகிரி பாரன்ஹீட் என்ற அளவிலை வெப்பநிலை நீடிக்க வாய்ப்புள்ளது.

நடப்பு ஆண்டில் வடகிழக்குப் பருவ மழை ஜனவரி 15 வரையிலும் நீடித்ததால் பனிக் காலத்தின் அளவு குறைந்தது. இதனால் கோவையில் ஏப்ரல் 15ஆம் தேதிக்கு மேல் உயர வேண்டிய வெப்பநிலை மாா்ச் இறுதி வாரத்திலேயே தொடங்கியுள்ளது. தவிர மாா்ச்சில் கோடை மழை தொடங்கியிருக்க வேண்டும். ஆனால், கோடை மழையும் பெய்யவில்லை. இதனால் வறண்ட வானிலையால் வெப்பத்தின் தாக்கம் அதிக அளவில் தெரிகிறது. இந்த வாரத்தில் கோடை மழை பெய்யும் என்று எதிா்பாா்க்கப்படுகிறது என்றாா்.