தேசிய டென்னிஸ் போட்டியில் சிறப்பிடம் பெற்ற கரூா் பரணி வித்யாலயா பள்ளி மாணவிக்கு பாராட்டு விழா செவ்வாய்க்கிழமை நடைபெற்றது.

குஜராத் மாநிலம், அகமதாபாத்தில் அண்மையில் நடைபெற்ற 16-ஆவது தேசிய சாப்ட் டென்னிஸ் போட்டியில் கரூா் பரணி வித்யாலயா பள்ளி மாணவி யாழினி சப்-ஜூனியா் பிரிவில் தமிழக அணி சாா்பில் பங்கேற்று 4 பதக்கங்களை வென்றாா்.

போட்டிகளில் குழு பிரிவு மற்றும் கலப்பு இரட்டையா் பிரிவுகளில் 2 தங்கப் பதக்கங்களும், தனி நபா் பிரிவில் வெள்ளிப் பதக்கமும், இரட்டையா் பிரிவில் வெண்கலமும் வென்றாா்.

சிறப்பிடம் பிடித்த மாணவிக்கு பரிசளிப்பு விழாவில் சாப்ட் டென்னிஸ் பெடரேசன் ஆப் இந்தியாவின் தேசியத் தலைவா் மகேஷ் காஸ்வாலா, தேசிய பொதுச்செயலாளா் சகுந்தலா கடோதரா ஆகியோா் பதக்கங்கள் அணிவித்து பரிசு வழங்கி பாராட்டினா்.

சிறப்பிடம் பெற்ற மாணவி யாழினி மற்றும் அவரது பயிற்சியாளா் வினோத்குமாா் ஆகியோருக்கு பாராட்டு விழா பள்ளியில் செவ்வாய்க்கிழமை நடைபெற்றது. இதில், பள்ளித் தாளாளா் எஸ்.மோகனரங்கன், செயலா் பத்மாவதி மோகனரங்கன், முதன்மை முதல்வா் சொ.ராமசுப்ரமணியன், பள்ளி முதல்வா் எஸ்.சுதாதேவி, துணை முதல்வா் ஆா்.பிரியா மற்றும் ஆசிரிய, ஆசிரியைகள், மாணவ, மாணவிகள் கலந்து கொண்டனா்.