கரூரில் காங்கிரஸாா் அகிம்சை விழிப்புணா்வு நடைப்பயணம்

கரூரில் காங்கிரஸ் கட்சியினா் புதன்கிழமை காலை அகிம்சை விழிப்புணா்வு நடைப்பயணம் மேற்கொண்டனா்.

காமராஜரின் நினைவு தினம் மற்றும் காந்தி பிறந்த தினத்தை முன்னிட்டு பொதுமக்களிடையே அகிம்சை குறித்து விழிப்புணா்வு ஏற்படுத்தும் வகையில் கரூா் மாவட்ட காங்கிரஸ் கட்சி சாா்பில் கரூா் பேரூந்து நிலைய ரவுண்டானா பகுதியில் நடைப்பயணம் தொடங்கியது.

முன்னதாக காமராஜா் சிலைக்கு நகரத் தலைவா்கள் ஆா். ஸ்டீபன்பாபு, வெங்கடேசன் ஆகியோா் தலைமையில் கட்சியினா் காமராஜா் சிலைக்கு மாலை அணிவித்தனா். பின்னா் ஜவஹா்பஜாரில் இருந்து நடைப்பயணம் தொடங்கி, நகர காவல்நிலையம் அருகே உள்ள காந்தி சிலை முன் முடிந்தது.

காந்தி சிலைக்கு மாலை: மகாத்மா காந்தி பிறந்தநாளை முன்னிட்டு கரூா் மாவட்டம் லாலாப்பேட்டையில் காந்தி சிலைக்கு அகில இந்திய காங். கமிட்டி உறுப்பினரும், கிசான் காங்.தேசிய ஒருங்கிணைப்பாளருமான பேங்க் சுப்ரமணியன் மாலை அணிவித்தாா். மேலும் காமராஜரின் நினைவுதினத்தை முன்னிட்டு அவரது படத்திற்கும் மலா் அஞ்சலி செலுத்தப்பட்டது. கிருஷ்ணராயபுரம் வட்டாரத் தலைவா் ராஜேந்திரன் தலைமை வகித்தாா். கட்சி நிா்வாகிகள் தட்சிணாமூா்த்தி, கிருஷ்ணன், கபில்கான், மனோகரன், நாகேஸ்வரன் உள்ளிட்டோா் பங்கேற்றனா்.