கரூா் சம்பவம் தொடா்பாக காவல்துறையினரையும் விசாரணைக்கு உள்படுத்த வேண்டும் என்றாா் அனைத்திந்திய மாதா் சங்க மத்திய குழு துணைத்தலைவா் பாலபாரதி.

கரூா் அரசு மருத்துவக்கல்லூரி மருத்துவமனையில் சிகிச்சை பெறுவோரை திங்கள்கிழமை சந்தித்து ஆறுதல் கூறிய அவா் செய்தியாளா்களிடம் கூறியதாவது: இந்த சம்பவத்துக்கு நேரத்தை சரியாக கடைபிடிக்காததால்தான் உயிரிழப்பு ஏற்பட காரணமாக இருந்துள்ளது. குறுகிய இடத்தில் இவ்வளவு கூட்டம் வரும் என காவல்துறை அதிகாரிகளுக்கு தெரிந்தும், ஏன் வேலுசாமிபுரத்துக்கு அனுமதி கொடுத்தாா்கள் எனத் தெரியவில்லை.

ஆகவே, காவல்துறையினரையும் விசாரணைக்கு உள்படுத்த வேண்டும். இதேபோல ஆம்புலன்ஸ் வருகை குறித்தும் விசாரிக்க வேண்டும். இழப்பீட்டுத் தொகையை அதிகரிக்க வேண்டும். எதிா்காலத்தில் இதுபோன்ற சம்பவங்கள் நிகழாமல் இருக்க அரசுடன் அனைத்து அரசியல் கட்சிகளும் இணைந்து கூட்டு முயற்சி எடுக்க வேண்டும் என்றாா் அவா்.

கிரிஸ்சோடங்கா் (காங்கிரஸ்): இது ஒரு மோசமான சம்பவம். காங்கிரஸ் சாா்பில் அறிவிக்கப்பட்ட நிவாரணத் தொகை செவ்வாய்க்கிழமை வழங்கப்படும். பிறகு செய்தியாளா்களின் கேள்விக்கு பதிலளித்த அவா், ஒரு நபா் ஆணையத்தின் தலைவா் ஓய்வுபெற்ற நீதிபதி அருணாஜெகதீசன், தூத்துக்குடி சம்பவம் குறித்து விசாரணை செய்து அறிக்கை அளித்தாா். அப்போது அவா் விசாரணை செய்தால் நம்புவாா்கள், இப்போது அதே நபா் விசாரணை செய்தால் நம்ப மாட்டாா்களா என்றாா் அவா்.