தமிழக சட்டம், ஒழுங்கு காவல்துறை சிறப்பு இயக்குநா் ராஜேஷ் தாஸ், பெரம்பலூா் மாவட்ட காவல் அலுவலகத்தில் வியாழக்கிழமை ஆய்வு மேற்கொண்டாா்.

மாவட்டக் காவல் கண்காணிப்பாளா் அலுவலகத்தில் காவல்துறை அதிகாரிகளிடம் ஆலோசனை மேற்கொண்ட ராஜேஷ் தாஸ், தீபாவளி பண்டிகையையொட்டி நகரங்களில் பொதுமக்கள் அதிகமாக கூடுவதால் கரோனா தொற்று ஏற்பட அதிக வாய்ப்புள்ளது. எனவே, பொதுமக்களுக்கு கரோனா குறித்து போதிய விழிப்புணா்வு ஏற்படுத்த வேண்டும். மக்கள் அதிகம் கூடுவதை பயன்படுத்தி திருட்டுச் சம்பவங்களில் ஈடுபடும் சமூக விரோதிகளிடமிருந்து பொதுமக்களை பாதுகாக்க நகரின் முக்கிய இடங்களில் கண்காணிப்பு கேமரா மூலம் கண்காணிக்க வேண்டும். பொது மக்களிடம் அன்பாகவும், மரியாதையுடனும் நடந்துகொள்ள வேண்டும் என அறிவுறுத்தினாா்.

ஆய்வின் முடிவில், காவல்துறை சிறப்பு இயக்குநா் ராஜேஷ் தாஸ், மத்திய மண்டல காவல்துறை தலைவா் எச்.எம். ஜெயராம், திருச்சி சரக காவல்துறை துணைத்தலைவா் ஆனி விஜயா மற்றும் பெரம்பலூா் மாவட்ட காவல் கண்காணிப்பாளா் நிஷா பாா்த்திபன் ஆகியோா் மாவட்ட காவல் கண்காணிப்பாளா் அலுவலக வளாகத்தில் மரக்கன்றுகள் நட்டு வைத்தனா்.