கிராம நிா்வாக அலுவலா் மா்ம முறையில் உயிரிழப்பு

பெரம்பலூா் அருகே கிராம நிா்வாக அலுவலா் மா்மமான முறையில் உயிரிழந்தாா்.

பெரம்பலூா் மாவட்டம், வேப்பந்தடை வட்டம், நூத்தப்பூா் கிராமத்தைச் சோ்ந்த சாமிநாதன் மகன் ஆரோக்கியசாமி (49). இவா் வேப்பந்தட்டை வடக்கு கிராம நிா்வாக அலுவலராகப் பணியாற்றி வந்தாா்.

வியாழக்கிழமை இரவு வேப்பந்தட்டை வட்டாட்சியரகத்தில் பணியை முடித்து விட்டு வீரகனூருக்குச் சென்றிருந்த ஆரோக்கியசாமி, நூத்தப்பூரிலுள்ள தனது வீட்டுக்குச் செல்வதாக சக அலுவலா்களிடம் கூறிவிட்டு, மோட்டாா் சைக்கிளில் சென்றாராம்.

ஆனால், நீண்ட நேரமாகியும் அவா் வீட்டுக்குச் செல்லவில்லையாம். இந்நிலையில், பெரம்பலூா்- ஆத்தூா் சாலையிலுள்ள பெரியம்மாபாளையம் பிரிவுச் சாலையில் வாயில் நுரைத் தள்ளிய நிலையில் ஆரோக்கியசாமி உயிரிழந்து கிடந்தது வெள்ளிக்கிழமை காலை தெரிய வந்தது.

தகவலறிந்த அரும்பாவூா் காவல்துறையினா் நிகழ்விடம் சென்று சடலத்தைக் கைப்பற்றினா். ஆரோக்கியசாமி எவ்வாறு உயிரிழந்தாா் என்பது குறித்து காவல்துறையினா் விசாரிக்கின்றனா்.