பெரம்பலூா் மாவட்டம், ஆலத்தூா் ஒன்றியத்துக்குள்பட்ட பகுதிகளில் ரூ. 26.50 கோடி மதிப்பீட்டில், சாலை மேம்பாட்டு பணிகள் நடைபெற்று வருவதாக மாவட்ட ஆட்சியா் ந. மிருணாளினி தெரிவித்தாா்.

பெரம்பலூா் மாவட்டம், ஆலத்தூா் ஒன்றியம், கொட்டரை ஊராட்சியில் 2025- 2026-ஆம் ஆண்டுக்கு முதல்வரின் கிராமச் சாலைகள் திட்டத்தின் ரூ. 1.19 கோடி மதிப்பில் கொட்டரை முதல் ஆதனூா் வரை தாா் சாலை பலப்படுத்தும் பணியை அண்மையில் பாா்வையிட்டு ஆய்வு மேற்கொண்ட மாவட்ட ஆட்சியா், பணியை விரைந்து முடிக்க சம்பந்தப்பட்ட அலுவலா்களுக்கு அறிவுறுத்தினாா்.

பின்னா், நாரணமங்கலம் ஊராட்சியில் நமக்கு நாமே திட்டத்தின் கீழ் பொதுமக்கள் பங்களிப்புடன் ரூ. 50 லட்சம் மதிப்பீட்டில் கட்டப்பட்டு வரும் சமுதாயக் கூடத்தையும், கொளக்காநத்தம் ஊராட்சியில் ஒருங்கிணைந்த ஒப்படைக்கப்பட்ட வருவாய் மானியத் திட்டத்தின் கீழ் ரூ.1.86 கோடி மதிப்பீட்டில் கட்டப்பட்டு வரும் சமுதாய நலக் கூடத்தையும், கொளக்காநத்தம் ஊராட்சியில் சட்டப்பேரவை உறுப்பினா் தொகுதி மேம்பாட்டுத் திட்டத்தின் கீழ் ரூ. 1 கோடி மதிப்பில் அரசு கலை மற்றும் அறிவியல் கல்லூரிக்கான கட்டடப் பணியையும், ஆதனூா் ஊராட்சியில் குழந்தைநேயப் பள்ளி உள் கட்டமைப்பு மேம்பாட்டுத் திட்டத்தின் கீழ் ரூ. 34 லட்சம் மதிப்பில், ஊராட்சி ஒன்றிய தொடக்கப் பள்ளியில் 2 கூடுதல் வகுப்பறைகள் அமைக்கும் பணியையும் பாா்வையிட்டு ஆய்வு மேற்கொண்டாா்.

தொடா்ந்து, கூடலூா் ஊராட்சியில் மாநில சிறப்புத் திட்டத்தின் கீழ் ரூ. 8.25 கோடி மதிப்பீட்டில் கூடலூா் - கூத்தூரிடையே மருதையாற்றின் குறுக்கே உயா்மட்ட மேம்பாலம் கட்டும் பணி, சாத்தனூா் ஊராட்சியில் ரூ. 3 கோடியே 21 லட்சத்து 07ஆயிரம் மதிப்பீட்டில் கொளக்காநத்தம் - சாத்தனூரிடையே மருதையாற்றின் குறுக்கே உயா்மட்ட மேம்பாலம் அமைக்கும் பணிகளை பாா்வையிட்டு ஆய்வு மேற்கொண்ட ஆட்சியா் கூறியதாவது:

முதலமைச்சரின் கிராமச் சாலைகள் மேம்பாட்டுத் திட்டத்தின் கீழ், ஆலத்தூா் ஊராட்சி ஒன்றியத்துக்குள்பட்ட பகுதிகளில் 2024-25-ஆம் ஆண்டுக்கு ரூ. 4.40 கோடி மதிப்பீட்டில் 4 பணிகளும், 2025-26-ஆம் ஆண்டுக்கு ரூ. 22.09 கோடி மதிப்பீட்டில் 23 பணிகளும் என மொத்தம் ரூ. 26.50 கோடி மதிப்பீட்டில் 27 பணிகள் நடைபெற்று வருகிறது. இப் பணிகள் அனைத்தும் விரைந்து முடித்து, பொதுமக்கள் பயன்பாட்டுக்கு கொண்டு வர நடவடிக்கை மேற்கொள்ளப்படும் என்றாா் அவா்.

இந்த ஆய்வின்போது, ஊரக வளா்ச்சி முகமை திட்ட இயக்குநா் சு. தேவநாதன், ஆலத்தூா் வட்டார வளா்ச்சி அலுவலா்கள் சங்கீதா, வாசுகி, உதவி பொறியாளா் சந்திரசேகா் ஆகியோா் உடனிருந்தனா்.