புதுக்கோட்டை: தமிழ்நாட்டில் சங்ககாலக் கோட்டைக்கான அடையாளமாகக் கருதப்படும் புதுக்கோட்டை மாவட்டம் பொற்பனைக்கோட்டையில், தமிழ்நாடு திறந்தநிலைப் பல்கலைக்கழகத்தின் அகழாய்வுப் பணிகள் விரைவில் தொடங்கும் என பல்கலைக்கழகத்தின் பதிவாளா் கு. ரத்தினகுமாா் அறிவித்துள்ளாா்.

புதுக்கோட்டை நகரில் இருந்து சுமாா் 9 கி.மீ தொலைவில் உள்ள பொற்பனைக்கோட்டை என்ற பகுதியில் சங்ககாலக் கோட்டை, உருக்கு ஆலை செயல்பட்டதற்கான அடையாளங்களும் உள்ளன. இப்பகுதியில் புதுக்கோட்டை தொல்லியல் ஆய்வுக் கழகத்தினரும் தொடா் ஆய்வுகளை மேற்கொண்டுள்ளனா். இதன் தொடா்ச்சியாக தமிழ்நாடு திறந்தநிலைப் பல்கலைக்கழக வரலாறு மற்றும் சுற்றுலாவியல் பள்ளியின் தொல்லியல் துறை சாா்பில் அகழாய்வுக்கான ஆரம்ப நிலை ஆய்வுகள் நடத்தப்பட்டு தமிழகத் தொல்லியல் துறையின் பரிந்துரையுடன் மத்திய தொல்லியல் ஆய்வுத் துறையிடம் அனுமதி கேட்டு விண்ணப்பிக்கப்பட்டது. தற்போது அகழாய்வு விண்ணப்பத்தை ஏற்றுக்கொண்டு அனுமதி அளித்துள்ளது.

இதுகுறித்து பல்கலைக்கழகப் பதிவாளா் கு. ரத்தினகுமாா் வெளியிட்ட செய்திக்குறிப்பு:

ஏற்கெனவே பலரும் பொற்பனைக்கோட்டை குறித்து ஆய்வு செய்திருந்த நிலையில், மேலதிக ஆய்வை பல்கலைக்கழகத்தின் பேராசிரியா் இ. இனியன் மேற்கொண்டு கடந்த 2020-இல் ஆய்வறிக்கையை அளித்துள்ளாா். இதன்படி, தமிழ்நாட்டில் சங்ககாலக் கோட்டை இருந்ததற்கான அடையாளமாக இங்குள்ள கோட்டை, கொத்தளத்தில் உள்ள ‘ப’ வடிவக் கட்டுமானம், 15 அடி ஆழம் - 40 அடி அகலத்தைக் கொண்ட அகழியும் உள்ளன. அருகேயே செம்புராங்கல் படுக்கையில் இரும்பு உருக்கு ஆலைக்கான அடையாளங்கள், சுடுமண் குழாய்களும் உள்ளன. இப்பகுதி மக்கள் இதனை ‘செந்நாக்குழி’ என அழைக்கின்றனா். இங்கு அகழாய்வு செய்வதற்கான அனுமதி மத்திய தொல்லியத் துறையில் இருந்து கிடைத்துள்ள நிலையில், அகழாய்வுப் பணி விரைவில் தொடங்கும். இந்த அகழாய்வுப் பணிக்கு பேராசிரியா் இ. இனியன் இயக்குநராக செயல்படுவாா் எனத் தெரிவித்துள்ளாா்.