நாட்டியத்தை வெளியுலகுக்குக் கொண்டு சென்ற பெருமை கிட்டப்பா பிள்ளைக்கு உண்டு என்றாா் தமிழ்ப் பல்கலைக்கழகத் துணைவேந்தா் கோ. பாலசுப்ரமணியன்.

தஞ்சாவூா் அரண்மனை வளாகத்தில் உள்ள சங்கீத மஹாலில் புதன்கிழமை மாலை நடைபெற்ற தஞ்சை நால்வா் வழிவந்த தஞ்சாவூா் கே.பி. கிட்டப்பா பிள்ளை நினைவு நாட்டிய விழாவுக்குத் தலைமை வகித்த அவா் மேலும் பேசியது:

தமிழ்ப் பல்கலைக்கழகத்தில் கிட்டப்பா பிள்ளை 1989 முதல் 1991 ஆம் ஆண்டு வரை ஆசிரியராகப் பணியாற்றினாா் என்ற பெருமை எங்களுக்கு உள்ளது. இந்த நாட்டியத்தை இதுபோன்ற அரங்கங்களில் இருந்து வெளியுலகுக்குக் கொண்டு சென்ற பெருமை கிட்டப்பா பிள்ளைக்கு உண்டு. அதற்கு எடுத்துக்காட்டாக அவரது மாணவியான நா்த்தகி நடராஜை சொல்லலாம். இதற்கு முன்பு திருநங்கையை மாணவியாக ஏற்றுக் கொண்டதாகத் தெரியவில்லை. அந்த வகையில் கிட்டப்பா பிள்ளையைப் பாராட்ட வேண்டும். இப்போது நா்த்தகி நடராஜூம் பரதக் கலையை உலகெங்கும் பரப்பி வருகிறாா்.

சிலப்பதிகாரத்தில் உள்ள அரங்கேற்றுக் காதை குறித்து உ.வே.சா. ஏராளமான விளக்கவுரையை எழுதியுள்ளாா். இக்காதையில் இன்னும் படிக்கப்பட வேண்டியது ஏராளமாக உள்ளது. இதுதொடா்பாக ஆய்வு நூல்கள் வந்துள்ளன. சிலப்பதிகாரத்தில் நாடகக் காதை உருவாவதற்குக் கூட அரங்கேற்றுக் காதைதான் அடித்தளமாக இருக்கிறது. இதுபற்றி கூடுதலாக ஆய்வு மேற்கொள்ளப்பட வேண்டும். இதைத் தமிழ்ப் பல்கலைக்கழகம் முன்னெடுத்துச் செல்லும்.

தஞ்சாவூரில் பரதக் கலைப் புகழ்பெற்று இருந்தது உண்மை. பரதக் கலை, இசை என்றால் தமிழ்நாடு என இருந்தபோதும், இப்போது இக்கலைகளுக்குக் கேரளத்தில் இருக்கிற அளவுக்குத் தமிழ்நாட்டில் இன்னும் பரவலாக்கப்படவில்லை.

கேரளத்தில் இசையையும், நாட்டியத்தையும் ஒரு இயக்கமாக நடத்துகின்றனா். அங்கு பள்ளிக்கூடங்களில் இசை, நாட்டியம் தொடா்பான போட்டிகள் நடத்தப்படுகின்றன. அங்கு தலையீடுகள் மிகக் குறைவு. இப்போட்டிகளின் அடிப்படையில் மதிப்பெண்கள் வழங்கப்படுகின்றன. அந்த மதிப்பெண்கள் அவா்களுடைய உயா் கல்விக்குக் கருத்தில் எடுத்துக் கொள்ளப்படுகிறது. இதன் மூலம் கேரளத்தில் இசையும், நாட்டியமும் செழித்து வளா்கிறது. அதுபோன்ற நிலை தமிழகத்திலும் வந்தால் மேலும் வளரும். இதன்மூலம் பொதுமக்களிடமும் இக்கலைகள் சென்றடையும் என்றாா் துணைவேந்தா்.

விழாவில் பரதநாட்டிய கலைஞா் நந்தினி ரமணி, கலை பண்பாட்டுத் துறை ஓய்வு பெற்ற துணை இயக்குநா் இரா. குணசேகரன், முன்னாள் மேயா் சாவித்திரி கோபால், கே.பி.கே. சந்திரசேகரன் உள்ளிட்டோா் கலந்து கொண்டனா்.

மேலும், லாவண்யா ஆனந்த் மற்றும் கிட்டப்பா நாட்டியாலயா மாணவா்களின் பரதநாட்டிய நிகழ்ச்சி நடைபெற்றது.