புதுக்கோட்டை மாவட்டம், ஆலங்குடி அருகே மாங்கோட்டையில் திங்கள்கிழமை நடைபெற்ற வடமாடு ஜல்லிக்கட்டில் 8 போ் காயமடைந்தனா்.

ஆலங்குடி அருகேயுள்ள மாங்கோட்டையில் காளியம்மன் கோயில் திருவிழாவையொட்டி வடமாடு ஜல்லிக்கட்டு நடைபெற்றது. இதில், புதுக்கோட்டை, சிவகங்கை, திருச்சி, திண்டுக்கல், மதுரை உள்ளிட்ட மாவட்டங்களைச் சோ்ந்த 11 காளைகள் கலந்துகொண்டன. மாடுபிடி வீரா்கள் 9 போ் ஒரு குழுவாக அனுமதிக்கப்பட்டனா். 1 குழுவுக்கு அரை மணி நேரம் என போட்டியில் 11 குழுக்களாக வீரா்கள் களம் இறக்கப்பட்டனா். இதில், காளைகள் முட்டியதில் 8 பேருக்கு காயம் ஏற்பட்டது. அவா்களுக்கு அங்கு தயாா் நிலையில் இருந்த மருத்துவக்குழுவினா் சிகிச்சை அளித்தனா். காளைகளை அடக்கிய வீரா்களுக்கும், அடங்காத காளைகளின் உரிமையாளா்களுக்கு பல்வேறு பரிசுப்பொருள்கள் வழங்கப்பட்டன. ஆலங்குடி காவல்துணைக்கண்காணிப்பாளா் முத்துராஜா தலைமையிலான போலீஸாா் பாதுகாப்புப் பணிகளை மேற்கொண்டனா்.