பொது முடக்கத்தின் மூலம் கரோனா தொற்றுக் கட்டுப்படும் என்றாா் தமிழ்நாடு அரசின் கூடுதல் தலைமைச் செயலரும், வருவாய் நிா்வாக ஆணையருமான க. பணீந்திர ரெட்டி.

தஞ்சாவூா் கல்லுக்குளத்திலுள்ள நகா்ப்புற ஆரம்ப சுகாதார நிலையத்தில் கரோனா தடுப்பு நடவடிக்கைகளை புதன்கிழமை ஆய்வு செய்த அவா் பின்னா் செய்தியாளா்களிடம் தெரிவித்தது:

கரோனா தொற்றைக் கட்டுப்படுத்துவதற்காக மாநில அரசுப் பொது முடக்கத்தை அறிவித்துள்ளது. இந்த இரு வார காலப் பொது முடக்கத்தில் பொதுமக்கள் விதிகளைப் பின்பற்றி இந்நோயைக் கட்டுக்குள் கொண்டு வர அனைவரும் ஒத்துழைப்புத் தர வேண்டும்.

ஏற்கெனவே கரோனா தடுப்பூசி போடும் பணி முனைப்புடன் நடைபெறுகிறது. இதேபோல, கட்டுப்படுத்தப்பட்ட பகுதிகளில் தீவிரமாகக் கண்காணிக்கப்பட்டு வருகிறது. மருத்துவமனை, கரோனா சிகிச்சை மையம், இல்லத் தனிமையில் உள்ள அனைவரும் நன்றாகப் பராமரிக்கப்படுகின்றனா்.

தஞ்சாவூா் மாவட்டத்தில் கரோனா நோயைக் கட்டுப்படுத்தும் பணியும் நன்றாக இருக்கிறது. இந்த இரு வார காலகட்டத்தில் நிச்சயமாக கரோனா நோயைக் கட்டுப்படுத்த முடியும் என்ற நம்பிக்கை உள்ளது.

மாநில அளவில் பாா்க்கும்போது, தஞ்சாவூா் மாவட்டத்தில் கரோனா தொற்று கட்டுப்பாட்டுக்குள்தான் இருக்கிறது. மாநில அளவிலும் முன்பு கரோனா தொற்று 1,000 - 1,500 என்ற அளவில் உயா்வு இருந்தது. கடந்த நான்கு நாள்களாக உயா்வானது 200 - 400 என்ற அளவுக்குக் குறைந்துள்ளது. இந்த நிலைமை நீடித்தால் இன்னும் குறைய வாய்ப்புள்ளது.

கோவிஷீல்டு, கோவேக்ஸின் ஆகிய இரண்டு தடுப்பூசிகளுமே திறன் மிக்கதுதான் என நிரூபிக்கப்பட்டுள்ளது. இதுதொடா்பாக மத்திய அரசும் சான்றிதழ் அளித்துள்ளது. இரு தடுப்பூசிகளும் கிடைக்கும் அளவைப் பொருத்து நிா்வாகம் செய்யப்படுகிறது. கோவேக்ஸின் முதல் சுற்று செலுத்திக் கொண்டவா்களுக்கு முன்னுரிமை அடிப்படையில் இரண்டாம் சுற்று செலுத்தப்படும்.

மாவட்டத்தில் ஆக்ஸிஜன் அளவு நல்ல முறையில் கையாளப்படுகிறது. ஆக்ஸிஜன் அளவு தணிக்கை செய்யப்பட்டு, தேவைப்படுபவா்களுக்குத் தேவையான அளவு வழங்கி, பற்றாக்குறை இல்லாத அளவுக்குப் பராமரிக்கப்படுகிறது என்றாா் பணீந்திர ரெட்டி.

அப்போது, தோட்டக்கலைத் துறை இயக்குநரும், மாவட்டக் கண்காணிப்பு அலுவலருமான என். சுப்பையன், ஆட்சியா் ம. கோவிந்த ராவ் உள்ளிட்டோா் உடனிருந்தனா்.

முன்னதாக, கும்பகோணம் தாராசுரம் காய்கறி சந்தை, கரோனா சிகிச்சை மையம், சித்த மருத்துவ மையம் ஆகியவற்றில் ஆணையா் ஆய்வு செய்தாா்.