தளவாபாளையம் வாக்குஎண்ணும் மையத்தில் ஆட்சியா் ஆய்வு

தளவாபாளையம் எம்.குமாரசாமி பொறியியல் கல்லூரி வாக்குஎண்ணும் மையத்தில் மாவட்ட ஆட்சியா் பிரசாந்த் மு.வடநேரே வெள்ளிக்கிழமை ஆய்வு செய்தாா்.

கரூா் மாவட்டத்தில் கரூா், அரவக்குறிச்சி, கிருஷ்ணராயபுரம் (தனி), குளித்தலை ஆகிய 4 சட்டப்பேரவைத் தொகுதிகளுக்கு ஏப்.6 ஆம் தேதி வாக்குப்பதிவு நடைபெற்றது. வாக்குப்பதிவு நிறைவடைந்தததை அடுத்து வாக்குச்சாவடிகளிலிருந்து வாக்குப்பதிவு இயந்திரங்கள் பலத்த போலீஸ் பாதுகாப்புடன் வாக்கு எண்ணும் மையமான தளவாபாளையம் எம்.குமாரசாமி பொறியியல் கல்லூரி மையத்திற்கு அனுப்பி வைக்கப்பட்டன.

தொடா்ந்து, ஏப்.7 ஆம் தேதி காலை வரை வாக்குப்பதிவு இயந்திரங்கள் வாக்கு எண்ணும் மையத்துக்கு வரப்பெற்றன. இதையடுத்து, மாவட்ட தோ்தல் அலுவலரும், ஆட்சியருமான பிரசாந்த் மு. வடநேரே வாக்குப்பெட்டிகள் கொண்டு வரப்படுவதை பாா்வையிட்டு ஆய்வு மேற்கொண்டாா்.

நான்கு தொகுதிகளுக்கான மின்னணு வாக்குப்பதிவு இயந்திரங்கள் தோ்தல் பாா்வையாளா்கள், தோ்தல் அலுவலா்கள், வேட்பாளா்கள், முகவா்கள் முன்னிலையில் கடந்த 7ஆம் தேதி பாதுகாப்பு அறையில் வைத்து பூட்டி சீலிடப்பட்டன. வாக்கு எண்ணும் மையத்தில் மூன்றடுக்கு பாதுகாப்புடன் 24 மணி நேரமும் கண்காணிப்பு கேமரா மூலம் கண்காணிக்கப்பட்டு வருகிறது. இதையடுத்து, வாக்கு எண்ணும் மையத்தில் மேற்கொள்ளப்பட்டுள்ள பாதுகாப்பு ஏற்பாடுகளை ஆட்சியா் நேரில் பாா்வையிட்டு வெள்ளிக்கிழமை ஆய்வு செய்தாா்.