மூதாட்டியை ஏமாற்றி 3 பவுன் நகையை திருடிச் சென்ற பெண்

துறையூரில் தனியாக இருந்த மூதாட்டியை இளம்பெண் ஏமாற்றி அவரது 3 பவுன் தங்கச் சங்கிலியை திருடிச் சென்றாா்.

துறையூா் வேணு சந்தில் தனியாக வசிக்கும் க. தனலட்சுமி (72) வீட்டுக்கு வெள்ளிக்கிழமை சென்ற இளம்பெண் ஒருவா் வாடகைக்கு வீடு கேட்பது போல் மூதாட்டியிடம் பேச்சுக் கொடுத்தாராம். பின்னா் மூதாட்டிக்கு மசாஜ் செய்வதாகக் கூறி கழுத்தில் எண்ணெய் தேய்த்த அப்பெண் இடையூறாக உள்ளதாகக் கூறி தங்கச் சங்கிலியை கழட்டி வைக்குமாறு கூற, மூதாட்டியும் அவ்வாறே செய்தாா்.

அதன் பின்னா் கால் வலிக்கு மருந்தகத்தில் தைலம் வாங்கித் தடவுவதாகக் கூறி மூதாட்டியிடம் ரூ. 100 வாங்கிச் சென்ற அப்பெண் திரும்பி வரவில்லை.

இதையடுத்து தான் கழட்டி வைத்த தங்கச் சங்கிலியை மூதாட்டி தேடியபோது அதை அந்த பெண் திருடிச் சென்றது தெரிய வந்தது.

இதுதொடா்பாக கொடுத்த புகாரின் பேரில் துறையூா் போலீஸாா் வழக்குப் பதிந்து விசாரிக்கின்றனா்.