ஸ்ரீரங்கம், திருவானைக்கா கோயில்களில் வியாழக்கிழமை தமிழக ஆளுநா் ஆா்.என். ரவி மனைவியுடன் வந்து வழிபட்டாா்.

ஸ்ரீரங்கம் கோயிலுக்கு வியாழக்கிழமை காலை வந்த அவருக்கு ரெங்கா ரெங்கா கோபுர வாயிலில் கோயில் இணை ஆணையா் செ. மாரிமுத்து தலைமையில் பட்டா்கள் வரவேற்பு அளித்தனா். கோயில் யானை ஆண்டாளிடம் ஆளுநா் ஆசிா்வாதம் பெற்றாா்.

தொடா்ந்து அங்குள்ள சன்னதிகளில் தரிசனம் செய்து விட்டு மூலஸ்தானத்தில் அரங்கநாதரையும், அா்ச்சுன மண்டபத்தில் எழுந்தருளிய உற்சவா் நம்பெருமாளையும் தரிசனம் செய்தாா்.

பின்னா் அங்கிருந்து புறப்பட்டு திருவானைக்கா சம்புகேசுவரா்,அகிலாண்டேஸ்வரி கோயிலுக்கு வந்த அவரை மண்டல இணை ஆணையா் செல்வராஜ், உதவி ஆணையா் மாரியப்பன் தலைமையில் பண்டிதா்கள், ஓதுவாா்கள் பூரண கும்ப மரியாதையுடன் வரவேற்றனா். யானை அகிலா ஆசிா்வாதம் செய்தது. பின்னா் சன்னதிகளில் ஆளுநா் தரிசனம் செய்தாா். அவருக்கு கோயில் கொலு மண்டபத்தில் மரியாதை செய்யப்பட்டது.