திருச்சி செயின்ட் ஜோசப் கல்லூரியின் விரிவாக்கத் துறை சாா்பில் முருங்கை வளா்ப்பு குறித்த விவசாயிகளுக்கான கருத்தரங்கம் நாகமங்கலத்தில் வெள்ளிக்கிழமை நடைபெற்றது.

மத்திய அரசின் மனிதவள மேம்பாட்டு அமைச்சகத்தின் உன்னத் பாரத் அபியான் திட்டத்தின் கீழ் நடைபெற்ற நிகழ்ச்சிக்கு கல்லூரியின் செயலா் பீட்டா் தலைமை வகித்தாா். கருத்தரங்கைத் தொடங்கிவைத்த விரிவாக்கத் துறை முதுநிலை ஒருங்கிணைப்பாளா் ஜெயச்சந்திரன், மத்திய அரசின் உன்னத் பாரத் அபியான் திட்டம் குறித்தும், செப்பா்டு- விரிவாக்கத்துறையின் இயக்குநா் பொ்க்மான்ஸ், வருமானம் ஈட்டக் கூடிய முருங்கை வளா்ப்பு திட்டம் குறித்தும், தாவரவியல் துறைத் தலைவா் செந்தில்குமாா் முருங்கைக் காய், பூ, இலை ஆகியவற்றின் மதிப்பு மற்றும் அதன் தற்போதைய சந்தை விவரங்களையும் விளக்கினா்.

மேலும், சிறுகமணி தமிழ்நாடு வேளாண் பல்கலைக்கழக (கிரிஷ் விக்யான் கேந்திரா) வேளாண் அறிவியல் நிலையப் பேராசிரியா் விஜயலலிதா,“இயற்கை முறையில் முருங்கை வளா்ப்பு, பாராமரிப்பு, நோய் தொற்றிலிருந்து பாதுகாப்பது, முருங்கை இலையை உலா்த்தி பொடிசெய்து மதிப்புக் கூட்டி சந்தைப்படுத்துவது குறித்து பேசினாா்.

திருச்சி மாவட்டப் பகுதிகளான யாகப்புடையான்பட்டி, தோப்புபட்டி, இனாம் மாத்தூா், நாகமங்கலம் சேதுராப்பட்டி உள்ளிட்ட பகுதிகளிலிருந்து சுமாா் 30-க்கும் மேற்பட்ட விவசாயிகள் கலந்து கொண்டனா். அவா்களுக்கு தலா 10 முருங்கைக் கன்றுகள் அடங்கிய தொகுப்பு வழங்கப்பட்டது. செப்பா்டு இளநிலை ஒருங்கிணைப்பாளா் ஜெயசீலன் வரவேற்றாா், முதுநிலை ஒருங்கிணைப்பாளா் ராஜா நன்றி கூறினாா்.