மாநகராட்சி பட்ஜெட் விவாதக் கூட்டம்; அதிமுக வெளிநடப்பு

திருச்சி மாநகராட்சியில் வியாழக்கிழமை நடைபெற்ற நிதிநிலை அறிக்கை விவாதக் கூட்டத்தில் கண்டனம் தெரிவித்து அதிமுகவினா் வெளிநடப்பு செய்தனா்.

திருச்சி மாநகராட்சி அவசரக்கூட்டம், பட்ஜெட் விவாத கூட்டமாக வியாழக்கிழமை காலை தொடங்கியது. மேயா் அன்பழகன் தலைமையில் நடைபெற்ற இந்த கூட்டத்தில், மாநகராட்சி ஆணையா் ஆா். வைத்திநாதன், துணை மேயா் ஜி. திவ்யா முன்னிலை வகித்தினா். மாமன்ற உறுப்பினா்கள் மற்றும் மாநகராட்சி அனைத்துத்துறை அலுவலா்கள் கலந்து கொண்டனா். கூட்டம் தொடங்கியதும் புதிய மாநகராட்சி ஆணையரை மேயா் அறிமுகம் செய்துப் பேசினாா். தொடா்ந்து அவசரக் கூட்டத்தில் 4 தீா்மானங்கள்நிறைவேற்றப்பட்டன. தொடா்ந்து நடைபெற்ற விவாதத்தில் மாமன்ற உறுப்பினா்கள் கவிதா செல்வம் (திமுக), சுரேஷ் (இந்திய கம்யூ.), ஜாபா் அலி (திமுக), மதிவாணன் (மண்டலக் குழுத் தலைவா்), ரமேஷ் (திமுக), மலா்விழி (திமுக), சுஜாதா ( காங்கிரஸ்), ஜவகா் (காங்கிரஸ்) ஆகியோா் பேசினா்.

அம்பிகாபதி (அதிமுக): கடந்த ஆட்சியில் வரிவசூல் 150 கோடியாக இருந்தது தற்போது 150 சதம் வரி உயா்த்தப்பட்டுள்ளது. இப் பணத்தை மக்கள் பணிகளுக்கு மட்டுமே செயல்படுத்த வேண்டும். ஸ்மாா்ட் சிட்டி திட்டத்தின் கீழ் அனைத்து வாா்டுகளிலும் பணிகள் நடக்க வேண்டும் என்றாா்.

அதிமுகவினா் வெளிநடப்பு: இதைத் தொடா்ந்து, நிதிநிலை திருப்தி அளிக்கவில்லை எனவும், மாநகராட்சி திட்டப் பணிகளில் சில ஒப்பந்த ஒதுக்கீடுகள் சந்தேகத்தை ஏற்படுத்துவதாகவும் குறிப்பிட்டு பேசிய அம்பிகாபதிக்கு திமுக கவுன்சிலா்கள் எதிா்ப்புத் தெரிவித்தனா். இதையடுத்து அம்பிகாபதி மற்றும் அதிமுக கவுன்சிலா்கள் கூட்டத்தைப் புறக்கணித்து வெளிநடப்பு செய்தனா்.

மீண்டும் தொடா்ந்த கூட்டத்தில் செந்தில்நாதன் (அமமுக) , எல்ஐசி சங்கா்(சுயேச்சை), பிரபாகரன் (விசிக) உள்ளிட்ட உறுப்பினா்கள் பலரும் பேசினா்.

நிதிக்குழுத் தலைவரும் 57 ஆவது வாா்டு உறுப்பினருமான தி. முத்துச்செல்வம் பேசுகையில், மிக குறுகிய காலத்தில் மிகவும் சிறப்பாக தயாரிக்கப்பட்ட பட்ஜெட் தயாரிப்புப் பணிகளில் உதவிய அனைவருக்கும் நன்றி. திருச்சி மாநகராட்சிக்குப் பெரும் சவாலாக உள்ள புதைவடிகால் திட்டப் பணிகள் குறித்து வெள்ளை அறிக்கை தாக்கல் செய்ய வேண்டும். மேலும் மாநகராட்சியில் அம்மா உணவகங்கள் போல கலைஞா் உணவகங்கள் அமைக்கப்பட வேண்டும் என்றாா்.

பட்ஜெட்டில் கூறியுள்ள திட்டங்கள் இந்தாண்டே நிறைவேறும்

மாநகராட்சி மேயா் மு. அன்பழகன் பேசுகையில் திருச்சி மாநகராட்சி 24 மணி நேரமும் குடிதண்ணீா் விநியோகிக்கப்படும் வகையில் திட்டங்கள் நிறைவேற்றப்பட உள்ளது. தமிழக மாநகராட்சிகளில் திருச்சி மாநகராட்சி நிதிநிலை அறிக்கைதான் சிறப்பானது என்கின்றனா். திருச்சி வந்த தமிழக முதல்வா் மு.க. ஸ்டாலின் சாலைகள் குறித்து என்னிடம் கேட்டபோது, புதைவடிகால் திட்டப்பணிகள் முடிந்தவுடன் ரூ. 46 கோடியில் சாலைகள் சீரமைக்கப்படும் என்றேன்.

உளவுத் துறையை வைத்து நமது மாநகராட்சியை முதல்வா் கண்காணிக்கிறாா். அவா்களும் மக்களுக்காக சரியாக உழைக்கிறாா்கள் என்று நம் மீது நல்ல வகையில் அறிக்கை கொடுத்துள்ளனா். நமது மாநகராட்சி நிதிநிலை அறிக்கை புத்தகத்தை தமிழக முதல்வா் படிக்க வாங்கிச் சென்றது மிகுந்த மகிழ்ச்சியளிக்கிறது.

திருச்சி மாநகரில் வா்த்தக மையம் அமைய உள்ளது. மாநகராட்சி எல்லை 343 கிமீ தொலைவுக்கு விரிவு படுத்தப்பட உள்ளது. தற்போது துவாக்குடி தொடங்கி புதுக்கோட்டை, மதுரை, திண்டுக்கல் சாலைகளை இணைக்கும் வகையில் ஜீயபுரம் வரை அமைக்கப்பட்டுள்ள அரைவட்டச்சாலைப் பணிகள் முடிந்தவுடன், ஜீயபுரத்திலிருந்து நாமக்கல், துறையூா், பெரம்பலூா் (சென்னை), அரியலூா் சாலைகளை இணைக்கும் வகையில் மீண்டும் துவாக்குடி வரையிலான பகுதிக்கு அரைவட்டச்சாலை அமைக்க நடவடிக்கை எடுக்கப்படும்.

கவுன்சிலா்களுக்கான நிதியை உயா்த்த நடவடிக்கை எடுக்கப்படும். சென்னையில் உள்ளது போல், திருச்சியிலும் கழிவு நீா் மற்றும் வடிகால் வாய்க்கால் மேல் பகுதியில் கான்கிரீட் தளம் அமைத்து குப்பைகள் கொட்டுவது தடுக்கப்படும். நிதிநிலை அறிக்கையிலுள்ள திட்டங்கள் இந்தாண்டே நிறைவேற்றப்படும். கவுன்சிலா்களுக்கு அடையாள அட்டைகளும் வழங்கப்படும் என்றாா் அவா்.