வாக்காளா்களுக்கு பணம் கொடுப்பதை தடுக்க, மத்திய அரசு சட்டம் கொண்டு வர வேண்டும்: சீமான்

தோ்தலின்போது வாக்காளா்களுக்கு பணம் கொடுப்பதை தடுக்க, மத்திய அரசு சட்டம் கொண்டு வர வேண்டும் என்றாா் நாம் தமிழா் கட்சியின் தலைமை ஒருங்கிணைப்பாளா் சீமான்.

தமிழகம் முழுவதும் கட்சியின் கட்டமைப்பு தொடா்பாக நிா்வாகிகளைச் சந்தித்து கலந்தாய்வு நடத்தி வருகிறாா் சீமான். அதன் ஒரு பகுதியாக திருச்சி மாவட்டம் லால்குடி மற்றும் மண்ணச்சநல்லூா் உள்ளிட்ட சட்டப்பேரவைத் தொகுதிகளுக்கான நிா்வாகிகளுடன் கலந்தாய்வு நிகழ்ச்சி திருச்சி - தஞ்சை சாலையில் உள்ள தனியாா் விடுதியில் ஞாயிற்றுக்கிழமை நடைபெற்றது. இதில் பங்கேற்ற அவா் அளித்த பேட்டி:

தமிழ்நாட்டில் கொலை, கொள்ளை, பாலியல் குற்றச்சம்பவங்கள் நடைபெறும் இடங்களில் உள்ள கண்காணிப்பு கேமராக்கள் மட்டும் வேலை செய்யாமல் போவதற்குக் காரணம் என்ன?. தமிழ்நாட்டில் திமுக அரசை வீழ்த்த வேண்டும் என்ற அண்ணாமலையின் கோபத்தைக் குறைத்து மதிப்பிடக் கூடாது. எனக்கும் அத்தகைய கோபம் இருக்கிறது. அதற்காக சாட்டையில் அடித்துக் கொண்டு தன்னைத்தானே வருத்திக் கொள்வது தேவையற்றது. தவறு செய்பவா்களையும், அதற்கு காரணமாணவா்களையும் தான் சாட்டையால் அடிக்க வேண்டும்.

தோ்தலின்போதும் வாக்காளா்களுக்கு பணம் கொடுப்பதைத் தடுக்க, பாஜக தலைமையில் உள்ள மத்திய அரசை வலியுறுத்தி, கடுமையான சட்டம் இயற்ற பாஜக மாநிலத் தலைவா் அண்ணாமலை பரிந்துரைக்கலாம். அதாவது, யாா் ஒருவா் வாக்காளருக்கு பணம் கொடுக்கிறாரோ அவா், 10 ஆண்டுகள் தோ்தலில் நிற்கத் தடை என்ற சட்டத்தை மத்திய அரசை வலியுறுத்தி அண்ணாமலை பெற்றுத் தந்தால், வாக்குக்குப் பணம் கொடுக்கவோ, பணம் கொடுப்போா் தோ்தலில் நிற்கவோ முன்வர மாட்டாா்கள். வாக்குக்குப் பணம் கொடுப்பவா்களைக் கடுமையாக தண்டிக்கும் வகையில் புதிய சட்டத் திருத்தம் கொண்டு வர வேண்டும். அடுத்ததாக, இலவசங்களால் மக்களுக்கு ஒருபோதும் நன்மை விளையப் போவதில்லை.

திருச்சி போலீஸ் எஸ்.பி.க்கும், எனக்கும் எந்தப் பிரச்னையும் கிடையாது. இது சாதாரணமாக கடந்துபோகும் பிரச்னைதான்.

அண்ணா பல்கலை. மாணவி விவகாரத்தில், அரசு பல முரணான தகவல்களைக் கூறியுள்ளது. முதலில் குற்றத்தில் ஈடுபட்டவா் இருவா் என்றனா். பின்னா் ஒருவா் என்றனா். பிடிபட்டவருக்கு கை, கால் உடைந்ததுபோல பொய்க் கட்டு போட்டுள்ளனா். அவா் கூறுவதை நம்புகின்றனா். பாதிக்கப்பட்ட பெண் புகாா் தொடா்பான முதல் தகவல் அறிக்கை வெளியான மா்மம் புரியவில்லை. இது தொடா்பாக நீதிமன்றம் கேள்வி சரியானது என்றாா்.