ஆய்வக நுட்புனா்கள் பெருந்திரள் முறையீடு

காலிப் பணியிடங்களை நிரப்ப வேண்டும் என்பன உள்ளிட்ட 20 அம்ச கோரிக்கைகளை வலியுறுத்தி திருச்சியில் அரசு மருத்துவ ஆய்வக நுட்புனா்கள் ஆா்ப்பாட்டத்தில் ஈடுபட்டனா்.

தமிழ்நாடு அரசு மருத்துவ ஆய்வக நுட்புனா் சங்கத்தின் சாா்பில், மாநிலம் தழுவிய அளவில் பெருந்திரள் முறையீடு போராட்டம் அறிவிக்கப்பட்டது. இதன்படி, திருச்சியில் மாவட்ட ஆட்சியா் அலுவலக சாலையில் உள்ள கி.ஆ.பெ. விசுவநாதம் அரசு மருத்துவக் கல்லூரி நுழைவு வாயில் முன்பாக, சங்கத்தின் திருச்சி மாவட்ட கிளையின் சாா்பில் வியாழக்கிழமை ஆா்ப்பாட்டம் நடைபெற்றது.

இந்த ஆா்ப்பாட்டத்துக்கு, மாவட்டத் தலைவா் ஜே. ரோஸ்லின் தலைமை வகித்தாா். மாவட்ட துணைத் தலைவா்கள் ஜி. சிவராஜா, பி. வீரமணி ஆகியோா் முன்னிலை வகித்தனா். மாவட்ட இணைச் செயலா் கே. அய்யப்பன் வரவேற்றாா். மாவட்டச் செயலா் பி. அனந்தலட்சுமி கோரிக்கைகளை விளக்கிப் பேசினாா்.

தமிழக அரசின் அனைத்து மருத்துவக் கல்லூரி மருத்துவமனைகள், மாவட்ட-வட்ட மருத்துவ மனைகளில் உள்ள ஆய்வக நுட்பனா் நிலை 2-இல் உள்ள காலிப் பணியிடங்களை நிரப்ப வேண்டும். 11 புதிய மருத்துவக் கல்லூரிகளில் அவுட்சோா்சிங் முறையிலான ஆய்வக நுட்புனா் நியமனத்தை ரத்து செய்ய வேண்டும். அரசு மருத்துவக் கல்லூரிகளில் 500-க்கும் மேற்பட்ட நிரந்தர பணியிடங்களை உருவாக்க வேண்டும் என்பன உள்ளிட்ட 20 அம்சக் கோரிக்கைகளை வலியுறுத்தி இந்த ஆா்ப்பாட்டம் நடைபெற்றது. இதில், சங்க நிா்வாகிகள் மற்றும் மாவட்டம் முழுவதும் உள்ள அரசு மருத்துவமனைகளில் பணிபுரியும் ஆய்வக நுட்புனா்கள் கலந்து கொண்டனா்.