மாற்றுத்திறனாளி பெண்ணுக்கு பாலியல் வன்கொடுமை: மேஸ்திரிக்கு ஆயுள்

வேலுாா்: மாற்றுத்திறனாளி பெண்ணை பாலியல் வன்கொடுமை செய்த கட்டட மேஸ்திரிக்கு ஆயுள் தண்டனை விதித்து வேலூா் மகளிா் நீதிமன்றம் தீா்ப்பளித்துள்ளது.

வேலுாா் இலவம்பாடி பகுதியைச் சோ்ந்த மணிவண்ணன் (47), கட்டட மேஸ்திரி. இவா் 2019-ஆம் ஆண்டு ஒரு கிராமத்தைச் சோ்ந்த 20 வயது மாற்றுத்திறனாளி பெண் வீட்டில் தனியாக இருந்ததை அறிந்து அங்கு புகுந்து அந்த பெண்ணை பாலியல் வன்கொடுமை செய்துள்ளாா். அந்த பெண் கதறி அழுததை அறிந்து அப்பகுதி மக்கள் விரைந்து சென்று மணிவண்ணனை பிடித்து விரிஞ்சிபுரம் காவல் நிலையத்தில் ஒப்படைத்தனா்.

மேலும், அந்த பெண்ணின் உறவினா்கள் அளித்த புகாரின்பேரில் போலீஸாா் வழக்குப்பதிவு செய்து மணிவண்ணனை கைது செய்தனா். இந்த வழக்கு விசாரணை வேலூா் மகளிா் நீதிமன்றத்தில் நடைபெற்று வந்தது. இதில், மணிவண்ணன் மீதான குற்றச்சாட்டுகள் நிரூபிக்கப்பட்டதை அடுத்து அவருக்கு ஆயுள் தண்டனையும், ரூ. 30,000 அபராதமும் விதித்தும், அபராதம் செலுத்தத் தவறினால் மேலும் 6 மாதம் சிறை தண்டனையும் விதித்து நீதிபதி ராதாகிருஷ்ணன் தீா்ப்பளித்தாா்.

தொடா்ந்து மணிவண்ணன் வேலூா் மத்திய சிறைக்கு கொண்டு செல்லப்பட்டாா்.